Baıbek tramvaı deposyn ne úshin japqanyn túsindirdi
ALMATY. QazAqparat -Almaty ákimi Baýyrjan Baıbek halyqpen esepti kezdesýinde tramvaı deposy ne úshin jabylǵany týraly suraqqa jaýap berdi, dep habarlaıdy QazAqparat tilshisi.
Ákimniń kezdesýinde aǵa býyn ókilderi Almaty deposynyń ne úshin jabylǵanyn jáne jeńil relsti travmaı (JRT) joldary qashan salynatynyn surady.
«Men ózim almatylyqpyn, uzaq ýaqyt travmaı joly ótetin kóshedegi úıde turdym. Tıimdi, dúrsili kóp kólik. Páterimizge kelgende tramvaıdyń dirilinen jer silkingen shyǵar dep oılaıtynbyz. Ol kezde bizde barlyǵy 16 tramvaı bolatyn. Birneshe daýly oqıǵa boldy, abyroı bolǵanda eshkim qaza tapqan joq. Ábden tozyǵy jetken. Buǵan deıin eshkim ınvestıtsııa salmaǵan. Biz oǵan qarjy quısaq, kóp aqsha jumsaıtynymyzdy eseptedik. Sondyqtan, Shevchenko men Qonaev kóshelerindegi relsterdi alyp tastadyq»,-dedi shahar basshysy.
Onyń sózinshe, osydan soń qaladaǵy kólik qozǵalysy 15 paıyzǵa jaqsarǵan.
«Tóle bı kóshesindegi relsterdi almaımyz, sebebi ol relspen JRT ótedi. JRT jobasyna 123 mlrd teńge qajet. Negizi, bul - álemdegi eń tıimdi jobalardyń biri. Metrodan arzan, avtobýstan qymbat. Biraq, JRT - ekologııalyq taza kólik túri. JRT joly Kók bazardan bastalyp, Almaty arenaǵa deıin barady. Tóle bı kóshesi negizgi - kúre joly. Bıyl jyldyń sońynda biliktilikke deıingi kezeńi ótedi sosyn ol jobany júzege asyrýdy bastaımyz. Valıýta táýekelderine baılanysty óte kúrdeli joba. Sebebi, bizdiń Qazaqstanda tramvaı shyǵarylmaıdy»,- dedi Baıbek.
foto: www.qamshy.kz
