Baıbek Sıngapýrdyń kólik salasyndaǵy tájirıbesin Almatyǵa engizbek
ALMATY. QazAqparat - Almatyda «Smart sıtı» jobasyn júzege asyrýǵa Sıngapýr kompanııalary qatysatyn boldy, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasaı otyryp.
Ondaı kelisim Almaty qalasy ákiminiń Sıngapýrge jumys sapary barysynda jasalǵan.
Qalalyq ákimdiktiń habarlaýynsha, Almaty delegatsııasy Sıngapýrdyń isker ortasy men ekijaqty kelisimge qoljetkizgen.
«Ekijaqty kezdesý aıasynda Baýyrjan Baıbek Sıngapýrdyń Ońtústik Shyǵys aýdanynyń meri jáne syrtqy ister boıynsha aǵa memlekettik mınıstr Muhammed Malık Osmanmen jáne Sıngapýrdyń saýda, óndiris ulttyq damý jónindegi aǵa memlekettik mınıstri Ko Po Kýnmen júzdesti. Baýyrjan Baıbektiń saparynda Sıngapýrdyń Jer betindegi kóligi jónindegi agenttik qyzmetine erekshe den qoıylyp, kólik júıesin ıntegratsııalaý máselesi keńinen sóz boldy», - delingen habarlamada.
Aıta keteıik, búgingi kúni Sıngapýrde halyq tyǵyz ornalasqan, sondyqtan qoǵamdyq kólikti damytýǵa jete mán berilgen. Munda kólik turaqtaryn azaıtý, joldy paıdalanǵany úshin aqy tóleýdi engizý arqyly jeke kólikter qatary sıregen. Sıngapýr bıligi 2018 jyly eski kólikterdi joıý baǵdarlamasynyń arqasynda jeke kólik sanyn múldem azaıtýdy qarastyrǵan. Eski kólik ár 10 jyl saıyn joıylady, jańa avtomobıl sodan keıin ǵana tirkeledi.
Baýyrjan Baıbek sıngapýrlyqtarmen kezdesýde Almatyda aýqymdy kólik reformasy júzege asyryp jatqanyn, aldaǵy ýaqytta Sıngapýrdyń kólik salasyndaǵy tájirıbesin paıdalanatynyn aıtqan.
«Almaty kóshelerin kún saıyn 700 myńnan astam kólik júrip ótedi, sonyń saldarynan qala trafıgine qysym jasalýda. Biz qoǵamdyq kólikke erekshe nazar aýdaramyz. Jyl aıaǵyna deıin qala avtobýs parkiniń úshten biri jańarady, JRK jobasyna daıyndyqtar jasalýda, BRT dálizi qurylady, metro qurylysy jalǵasady, avtobýstarǵa arnalǵan arnaıy jolaqtar uzyndyǵy 100 shaqyrymǵa deıin jetedi. Kólik turaqtary qolǵa alynyp, veloınfraqurylym, jaıaý júrginshi aımaqtary paıda bolýda», - dedi Baýyrjan Baıbek.
Sonymen qatar, Almaty delegatsııasy Sıngapýrdyń strategııalyq josparlaý jáne qala qurylysyn baqylaý jónindegi agenttiginiń jumys tájirıbesine jete mán berdi.
«Búgingi kúni biz «Almaty-2020» baǵdarlamasyn júzege asyrýdamyz, onyń basty baǵyty ekologııa, transport reformasy, densaýlyq saqtaý, qaýipsizdik jáne ınfraqurylymdy damytý. Qalanyń ekonomıkalyq áleýetin arttyratyn sheberlik josparyn da jasadyq. Tehnologııa únemi ózgeredi, sondyqtan biz qala turǵyndarynyń ómirin jaqsartatyn jobalardy engizetin bolamyz», - dep atap ótti ákim.
Baýyrjan Baıbektiń jumys saparynyń qorytyndysy boıynsha sheteldik seriktester úshin baǵdarlamalar men sheshimder daıyndaıtyn «Singapore Cooperation Enterprise» memlekettik agenttik Almatyǵa smart-tehnologııany engizýge, qala qurylymyn tıimdi josparlaýǵa jáne sheberlik josparlardy jasaýǵa kómektesetin bolady.
Osy rette Almatyny damytý ortalyǵy, Almaty qalasynyń Sáýlet jáne qala qurylysy basqarmasy men «Singapore Cooperation Enterprise» arasynda jasalǵan tıisti memorandýmǵa qol qoıyldy.
