Baıbek: Polıtseıdiń jumysy aýyr, jalaqysy az
ALMATY. QazAqparat - Almaty ákimi halyqpen esepti kezdesýinde qalalyq polıtsııanyń jumysyn da tilge tıek etti, dep habarlaıdy QazAqparat tilshisi.
Onyń aıtýynsha, polıtsııanyń materıaldyq-tehnıkalyq qamtylýyna jergilikti bıýdjetten 14 mlrd teńge baǵyttalǵan.
«Qazirgi tańda qalalyq polıtsııa vıdeoaqylaý kameralarymen, GPS navıgatorlarmen 87 paıyz qamtylǵan. Bul jumystar qalada sybaılas jemqorlyq kórsetkishiniń sanyn azaıtýǵa septigin tıgizedi. Qala basshylyǵy polıtsııanyń jumys sapasyn kóteretinine senim artyp otyr. Kim osy úshin jumys istep, kúsh salmasa, ol adammen qosh aıtysamyz. Júıeni tazalaımyz. Byltyrdyń ózinde ІІD basshylyǵy 170 polıtsııa qyzmetkerin jumystan qýǵan. Polıtsııa qatarynda jumys isteıtinder az ǵana jalaqyǵa túngi 12-ge deıin júredi. Olardyń kópshiligi Almaty oblysynda «vremıankalarda» turyp jatyr. Tańǵy 7-de jumysta bolýy kerek. Bul ońaı jumys emes. Biz oınap-kúlip ómir súrip jatyrmyz. Bizdiń qaýipsizdigimizdi bireý kúzetip júr ǵoı», - dedi Baýyrjan Baıbek.
Ákim polıtseılermen bolǵan keleńsiz oqıǵalardy eshkim ashyq jarııalaǵysy kelmeıtinin aıtty.
«Qazir vıdeotirkegishter, GPS navıgatorlar bar. Kóp adamdar quqyqbuzýshylyqqa kýá bolsa da, aıtýǵa qorqady. Al shaǵym aıtýǵa kelgende bári myqty. Ondaı nársege kýá boldyńyz ba, ınternetke jarııalap jiberińiz, sózge kelmesten shara qabyldaımyz. Parany berýge qushtar adam kóp. Eger polıtseıge eshkim para usynbasa, ol almas edi», - dedi ákim.
