Baıbek pen Muhamedıuly Almatydaǵy Elbasy kitaphanasynyń kóshpeli jobasyn tamashalady

ALMATY. QazAqparat - Almaty ákimi Baýyrjan Baıbek pen QR Mádenıet jáne sport mınıstri Arystanbek Muhamedıuly Almatydaǵy Elbasy kitaphanasynyń «N. Nazarbaev: epoha, lıder, obşestvo» ǵylymı aǵartýshylyq jobasynyń ashylýyna qatysty, dep habarlaıdy QazAqparat tilshisi.

Kelýshiler nazaryna kitaphananyń arhıv, kitap, mýzeı qorynyń sırek jádigerleri, Elbasynyń joǵary memlekettik marapattary, Qurandar kollektsııasy, ózge memleket basshylarynyń qoltańbasymen kitaptar, N.Nazarbaevtyń shet tilindegi kitaptary qoıyldy.
 

Astanadaǵy Elbasy mýzeıinen 800 túpnusqa qoljazba, sýret, jeke zattary ákelindi.

«Almaty Memleket basshysynyń tulǵasymen tikeleı baılanysty qala. Munda Qazaqstan táýelsiz memleket bolyp jarııalandy, Konstıtýtsııa qabyldandy, Memlekettik rámizder bekitildi, Ulttyq valıýta engizildi. Sondaı-aq, qazaqstan Prezıdentiniń tuńǵysh saılaýy, alǵashqy ulyqtaý rásimi ótti. Sondyqtan, Elbasy kúni qarsańynda mundaı aýqymdy sharanyń ótýi - almatylyqtar úshin úlken mártebe», - dedi Baýyrjan Baıbek.
 

Kóshpeli kórme Almatyda 2 aıdaı turady. Keıin kórme Qaraǵandy men Shymkent qalalaryna ketedi.

Sonymen qatar, Mádenıet mınıstri men qala ákimi Elbasy Nursultan Nazarbaevtyń el damýyndaǵy róli jaıly ótetin ǵylymı praktıkalyq konferentsııa jumysyna qatysady.