Baıbek qysqa deıin sozylatyn jol qurylysy jobasyn synǵa aldy
ALMATY. QazAqparat - Almaty ákimi Baýyrjan Baıbek qalanyń barlyq merdigerlik uıymdarynyń qatysýymen megapolıstiń kósheleri men joldaryn jóndeýge qatysty keńeıtilgen keńes ótkizdi, dep habarlaıdy QazAqparat tilshisi.
Almatyda 2018 jyly 157 kósheni jóndeý, sonymen qatar Maqataev, Baıtursynov jáne Jarokov kóshelerindegi uzyndyǵy 15,7 shaqyrym bolatyn tramvaı joldaryn demontajdaý josparlanǵan.
Jıyn barysynda qalanyń Jolaýshylar kóligi jáne avtomobıl joldary basqarmasynyń basshysy Maqsut Isahov baıandama jasady.
Onyń aıtýynsha, 24 kósheniń bordıýrleri tolyq jańartylady, kóshelerdiń 43 paıyzy qaıta jasalady. Barlyq jóndeý jumystaryn 2018 jyldyń qarasha aıynda aıaqtaý josparlanǵan.
Ákim qurylys jumystarynyń bulaısha uzaqqa sozylatynyn synǵa alyp, basqarmaǵa keste men jobalaý ádisterin qaıta qaraýdy tapsyrdy.
«Biz Almatyny «Qala - adamdar úshin jaıly» qaǵıdasy boıynsha damytýdamyz, sondyqtan jumystardy júrgizgen kezde kedergilerdi barynsha azaıtyp, ýaqytty qysqartqan jón. Ótken jyly joldardy jóndeý, jylý trassalaryn jańartý, ortalyqty jańǵyrtý jóninde aýqymdy jumystar júzege asty. Degenmen protsess barysynda birqatar kemshilikter anyqtaldy, ásirese taım-menedjment boıynsha. Bıylǵy jylǵa jasalǵan josparda keıbir merdigerlerdiń jóndeıtin joldary nebári 5 shaqyrym. Ony qarashaǵa deıin sozýdyń qajeti qansha? Qystyń aldynda tegis asfaltty jol kimge kerek?», - dedi Baýyrjan Baıbek.
Ol birneshe kún boıyna eski asfaltty alatyn, bordıýrlerdi shyǵaratyn jáne asfalt tóseýdi uzaqqa sozatyn eski ádisterden arylýdy qadap aıtty.
«Jumysqa kirispes buryn jóndeletin ár kóshe boıynsha aqaýy kórsetilgen aktili fotoalbomdy usynyńyzdar. Jumysqa barynsha keshendi túrde qarap, árbir aspektini oılanyp baryp jasaý kerek. Merdiger keıbir jerlerde aryq naýalaryn aýystyrý, qorshaýlardy, qaraýsyz qalǵan baǵanalardy, beton konstrýktsııalaryn, kereksiz jelilerdi, bir sózben aıtqanda, barlyq vızýaldy qoqysty alyp tastaý qajet ekenin bilýi tıis. Sonda ǵana is birneshe ret qaıtalap atqarylmaıtyn bolady. Onyń ústine, burynnan bar jasyl jelekti barynsha saqtaǵan jón», - dedi Baýyrjan Baıbek.
Aıta keterligi, qalada burynǵysynsha durys ornalaspaǵan turaq qaltalary jetkilikti.
Tipti, keıbir ýchaskelerde kólik ıeleri avtomobılderin buryshtap qoıyp, qozǵalys qabiletin tómendetip, apatty jaǵdaı týǵyzady. Megapolıs basshysy jol jóndegende osy faktordy eskerýdi, turaq qaltalarynyń bergi betterin ǵana abattandyrýdy tapsyrdy.
Almaty ákimi jol jóndeý barysynda kóshelerdiń jabylatyn bólikteri týraly turǵyndarǵa der kezinde habarlaý kerektigin de aıtty.
«Qandaı jumystardyń júretini jáne qashan aıaqtalatyny týraly habar berý qajet. Kompanııa basshylarynyń baılanys nómirlerine deıin jazylǵan tolyq aqparaty bar stend ornatylýy tıis. Aqparattyq resýrstarda jumys kestesiniń bolǵany jón», - dedi ákim.
Baýyrjan Baıbek keńestiń jumysyn qorytyndylaı kelip, qalanyń Jolaýshylar kóligi jáne avtomobıl joldary basqarmasyna bir apta ishinde jospar jasaýdy tapsyrdy. Onda árbir merdiger uıymdardyń qandaı jumystardy qashan jáne qalaı júrgizetini, naqtyly merzimi kórsetilýi tıis.
Ońtaılandyrylǵan jumys kestesi kelesi keńeste usynylýy qajet. Osyndaı tapsyrma qalanyń energetıka jáne kommýnaldy sharýashylyq basqarmasyna da berildi.
