Baıbek: Qazaqstannyń JІÓ-niń besten biri Almatynyń enshisinde
ASTANA. QazAqparat - Buqaralyq aqparat quraldarynyń ókilderimen ortalyq kommýnıkatsııalar qyzmetinde baspasóz máslıhatyn ótkizgen Almatynyń ákimi Baýyrjan Baıbek qalanyń ekonomıkalyq álemýttik-ekonomıkalyq damýy kórsetkishteri týraly aıtyp berdi, dep habarlaıdy «QazAqparat» HAA tilshisi.
«Jalpy qalanyń ekonomıkalyq kórsetkishteri, ásirese aǵymdaǵy jyldaǵy jahandyq ekonomıkalyq máselelerdi eskersek, oń nátıje kórsetip otyr. Bıylǵy jyldyń birinshi jartyjyldyǵy boıynsha qalanyń JІÓ 4 paıyzǵa artyp, 4,4 trıllıon teńgeni qurady. Búgingi tańda Almaty shaharyna respýblıkanyń JІÓ-niń besten bir bóligi tıesili. Naqtyraq aıtqanda, memleketimizdegi halyqtyń 10 paıyzdan astamy turatyn Almaty qalasy JІÓ-niń 22,6 paıyzyn, barlyq salyq túsimderiniń tórtten birinen astamyn qamtamasyz etip otyr», - deıdi Almaty ákimi.
Baýyrjan Baıbek sonymen birge, Memleket basshysynyń Almatyǵa sapary kezinde qandaı tapsyrmalar berilgenin jetkizdi.
«Búgingi tańda Almaty - iri óńirlik magnıt. Qyrkúıek aıynda Elbasy Nursultan Ábishuly Almatyǵa arnaıy kelip, qalamyzdaǵy birqatar ózgerister men jańa áleýmettik nysandarmen, jańarǵan kóshelermen tanysyp, baǵasyn berip ketken bolatyn. Almatyny damytý boıynsha Memleket basshysy keńes ótkizip, kópten beri sheshilmeı kele jatqan Úlken Almaty aınalma jolynyń qurylysyna kirisý, Almaty áýejaıyn jańǵyrtý, TETs-2-ni gazǵa kóshirý boıynsha birqatar tapsyrmalar berip ketti. Almaty Bas jospary ınstıtýtyn qurý týraly tapsyrmany oryndap ta qoıdyq», - deıdi qala ákimi.
Onyń aıtýynsha, megaopolıste bıylǵy jyly barlyq áleýmettik-ekonomıkalyq kórsetkishter boıynsha oń dınamıka qalyptasqan, negizgi kapıtal ınvestıtsııasy 12,8 paıyzǵa ósip, 400,5 mlrd teńgege jetkenin aıtyp berdi. Bul turǵyda syrtqy ınvestıtsııalar 23,5 paıyzǵa artqan.
