Baıbek bala súıe almaı júrgen 300 otbasyǵa tegin kómek kórsetýdi tapsyrdy
ALMATY. QazAqparat - Almaty ákimi Baýyrjan Baıbek ekstrakorporaldi uryqtaný boıynsha qarjy tapshylyǵynan kópten beri kezekte turǵan almatylyq 300 otbasyna tegin medıtsınalyq kómek kórsetý qajettigin tapsyrdy, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasaı otyryp.
Almaty ákimi Baýyrjan Baıbek búgin Almatyda jańa Reprodýktıvti ınstıtýttyń ashylýynda ortalyqtyń jumysymen tanysyp, osyndaı tapsyrma berdi. Ákim Almatynyń 2020 jylǵa deıingi damý baǵdarlamasynda qalalyq densaýlyq júıesin, sonyń ishinde medıtsınalyq týrızmdi damytýǵa erekshe mán berilgenin basa aıtty.
«Búgingi tańda sheteldik ınvestorlar Almatynyń medıtsına salasyndaǵy qyzmetine qyzyǵyp otyr. Reprodýktıvti medıtsına ınstıtýty klınıkasynyń ashylýy bizdiń qalamyzda medıtsınalyq týrızmdi damytýdyń jarqyn mysaly», - dedi qala ákimi.
Reprodýktıvti medıtsına ınstıtýynyń dırektory Tamara Júsipálıeva klınıka jylyna 3 myńǵa deıingi otbasyn qabyldaı alatynyn jetkizdi. Ol ekstrakorporaldi uryqtaný boıynsha barlyǵyna birdeı kómek kórsetý múmkin emes ekenin, Almatyda 300 otbasy qarjy joqtyǵy saldarynan birneshe jyl kezekte turǵanyn jetkizdi. Baýyrjarn Baıbek atalǵan 300 almatylyq otbasyǵa tegin medıtsınalyq kómek kórsetý sharalaryn izdestirýge tapsyrma berdi. Sonymen qatar, qala basshysy ekstrakorporaldi uryqtaný boıynsha júkti bolǵan áıelder úshin bosanatyn jańa perzenthana salatyn jer qarastyrýdy mindettedi.
Reprodýktıvti medıtsına ınstıtýtynda bedeýlikti medıtsına salasyndaǵy sońǵy tehnologııalar boıynsha emdeıdi.
Reprodýktıvti medıtsına ınstıtýynyń dırektory Tamara Júsipálıeva Qazaqstanda sapaly medıtsınaǵa degen suranys artyp otyrǵanyn jetkizdi.
«Sońǵy jyldary bizdiń qyzmetke degen suranys ósip, medıtsınalyq týrızm de damyp keledi. Jaqyn jáne alys shetelden emdelý úshin Almatyǵa keletinder jetkilikti. Túrkııadan, Germanııa men Reseıden, Qytaı men AQSh-tan keletinder de barshylyq», - dedi Ortalyq dırektory T.Júsipálıeva.
Ortalyq dırektorynyń málimetine súıensek, tek AQSh-tyń ózinen ǵana Reprodýktıvti medıtsına ınstıtýyna 75 emdelýshi kelgen.
Sonyń biri - 43 jastaǵy amerıkalyq Vera Smıff. Ol Qazaqstanda emdelý barysynda júkti bolǵan. Buǵan deıin otbasylyq jup úsh ret emdelgen eken.
«Qýanyshymda shek joq. Qazaqstanda, sonyń ishinde Almatyda medıtsınalyq týrızmniń bolashaǵy zor dep oılaımyn. Amerıkamen salystyrǵanda, mundaǵy baǵa aıyrmashylyǵy aıtarlyqtaı tómen. Qazaqstandaǵy dárigerlerdiń tájirbıesi men biliktiligi óte joǵary, al bul - medıtsınalyq týrızmdi damytýdyń basty sharty», - deıdi amerıkalyq emdelýshi Vera Smıff.
Jańa klınıkada 60 adam qyzmet etedi.
