Baıbek: Almatyda 732 aýla alańdary abattandyryldy
ALMATY. QazAqparat - Almaty ákimi Baýyrjan Baıbek «Rýhanı jańǵyrý» baǵdarlamasy aıasynda Túrksib aýdanyndaǵy jańa sport jáne aýla alańdarynyń ashylýyna qatysty, dep habarlaıdy QazAqparat tilshisi.
Qala basshysy jumys sapary barysynda S.Seıfýlllın atyndaǵy saıabaqty qaıta jasaý, «Juldyz» yqshamaýdanyndaǵy júrginshi aımaǵyn abattandyrý barysyn, aýlalardyń ahýalyn tekserdi.
Túrksib aýdanynda da aýlalardy qaıta jasaý jumystary júrip jatyr. Bıyl munda 80 aýlaǵa asfalt, kespe tas tóselip, oryndyq, ýrnalar qoıylǵan, sport jáne balalar alańdary jaryq kózderimen qamtylǵan.
Bulardan ózge, aýdanda «Rýhanı jańǵyrý» baǵdarlamasy aıasynda birneshe sport jáne balalar alańdary salynǵan.
«Búgin Prezıdentimiz Sizder úshin barlyq jaǵdaılardy jasaýda. Qalada sońǵy eki jylda 732 aýla alańdary abattandyryldy. Bul - árbir besinshi aýla. Bul jumysty biz keler jyly da jalǵastyramyz. Tek qalanyń ortalyǵy ǵana emes, barlyq aýlalar kórkeıedi, jastar sportpen shuǵyldanyp, balalar ózderiniń qaýipsiz aýlalarynda oınaıtyn bolady. Qazirgi kezde «Meniń aýlamdaǵy sport» jobasy aıasynda 6 myń bala 75 sport alańynda kásibı nusqaýshylarmen birge tegin jattyǵýda. 2020 jyldarǵa deıin qalanyń barlyq 600 sport alańyn qamtıtyn bolamyz», -dep atap ótti Baýyrjan Baıbek.
Jumys sapary barysynda Baýyrjan Baıbek «Juldyz» yqshamaýdanyndaǵy júrginshi aımaǵyn abattandyrý jumystarymen de tanysty.
Sonymen qatar, munda taıaý arada sport jáne balalar alańdary ashylyp, olarǵa arhıtektýralyq pishinder, oryndyqtar qoıylady jáne qoǵamdyq tamaqtaný orny paıda bolady.
Almaty ákimi qaıta jasalǵan S.Seıfýllın atyndaǵy saıabaqta boldy. Munda jańadan asfalt tóselgen, aryq jelisi jańarǵan, jańa velojoldar jasalǵan, gúlder, men jasyl jelek otyrǵyzylyp, balalar men sport alańdary jasaqtalǵan.
