Baıaý koksteý qondyrǵysy kúrdeli apatty jaǵdaıda emes – Atyraý munaı óńdeý zaýyty

ATYRAÝ. KAZINFORM – Atyraý munaı óńdeý zaýytynan baıaý koksteý qondyrǵysynyń kúrdeli apatty jaǵdaıy týraly aqparat shyndyqqa janaspaıtynyn málimdedi. 

Kásiporynnyń baspasóz qyzmetiniń málimetinshe, keıbir telegramm-arnalarda baıaý koksteý qondyrǵysynyń kúrdeli apatty jaǵdaıy týraly qaýesetke toly aqparat taralǵan.

– Bıyl qarasha aıynda júrgizilgen kúrdeli jóndeýden keıin baıaý koksteý qondyrǵysy shtatty rejımde jumys istep tur. Qondyrǵynyń qýaty táýligine 3 300 tonna deıin shıkizatty quraıdy. Ónim sapasy akkredıttelgen zerthanalarmen rastalǵan. Qondyrǵynyń barlyq jumys parametri – temperatýra, qysym jáne ónim sapasy belgilengen normalarǵa sáıkes keledi. Zaýyt barlyq ekologııalyq jáne óndiristik standarttardy saqtap otyr. Ókinishke qaraı, «AMÓZ» JShS qyzmetine kir keltirýdi kózdeıtin jekelegen tulǵalardyń múddesimen baılanysty bolýy múmkin qaýesetter taraldy. Bul qoǵamdyq pikirdi manıpýlıatsııalaý arqyly qajetsiz dúrbeleń men kásiporynnyń turaqtylyǵyna kúmán týǵyzady. Biz tek resmı kózderden alynǵan aqparatqa senýge shaqyramyz, - dep habarlady zaýyttyń baspasóz qyzmeti.

Baıaý koksteý qondyrǵysynnan úsh ónim shyǵarylady. Bul – benzın benzın, gazoıl jáne koks. 

– Barlyq ónim barlyq sapa standarttaryna tolyqtaı sáıkes keledi. Al táýelsiz sarapshylardyń baǵalaýy boıynsha reaktorlardyń boljamdy paıdaly qyzmet merzimi shamamen 10 jyldy quraıdy. Zaýytta 2021 jyldan beri turaqty tekserýler men jabdyqtardy jańǵyrtýdyń nátıjesinde atalǵan qondyrǵynyń jumysyndaǵy táýekelder 40 paıyzǵa tómendedi, - dep málim etti zaýyttyń baspasóz qyzmetinen.

Eske sala ketelik, buǵan deıin Atyraý munaı óńdeý zaýytynyń ashyq alańynda kúkirt jınaǵan kompanııaǵa aıyppul salynǵanyn habarlaǵan edik.