Baıaý ınternet qostanaılyq kásipkerlerge saýda jasaýǵa kedergi keltirip otyr

QOSTANAI. QazAqparat - Qostanaıdaǵy Narıman bazarynyń kásipkerleri álsiz ınternettiń saldarynan baqylaý-kassalyq mashınalardy qoldana almaı otyr. Osyndaı túıtkildi másele «Atameken» kásipkerler palatasynda ótken Kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl jónindegi keńes otyrysynda talqylandy, dep habarlaıdy QazAqparat.

Qostanaı oblysy óńirlik kásipkerler palatasynyń sarapshysy Jibek Seıitovanyń aıtýynsha, bıyl zań boıynsha kásipkerler saýda oryndaryna baqylaý-kassalyq qurylǵylardy ornata bastady. Alaıda olar atalǵan qurylǵylardy qoldana almaı álek. Basty kedergi - baıaý ınternet. Al mundaı qurylǵy ornatpaǵandar tártip buzýshylar bolyp shyǵa keledi.

«Qostanaı qalasy Narıman bazaryndaǵy saýda jasap otyrǵan kásipkerlerdiń shaǵymy oryndy. Salyq zańnamasyna sáıkes, 2019 jyldyń 1 qańtarynan bastap, ashyq saýda alańdarynda saýdamen aınalysatyn kásipkerler onlaın-baqylaý-kassalyq mashınalardy qoldanýǵa mindetti. Bul mashınalar arqyly aqsha esepteri týraly aqparat tikeleı salyq organdaryna túsedi. Qostanaı oblysy Kásipkerler palatasyna Narıman naryǵy kásipkerlerinen ujymdyq aryz kelip tústi. Olar baqylaý-kassalyq mashınalar qajetti deńgeıde jumys istemeıdi dep habarlady. Oǵan baıaý ınternet kedergi keltiredi», - dedi Qostanaı oblysy ÓKP sarapshysy Jibek Seıitova.

Osyǵan baılanysty Qostanaı oblysy Kásipkerler palatasy jumys tobyn qurǵan edi. Oǵan Memlekettik kirister departamenti, «Qazaqtelekom» AQ qostanaılyq fılıalynyń ókilderi jáne Narıman bazarynyń bastamashyl kásipkerleri qatysty.

«Mamandar kelip túsetin sıgnaldyń deńgeıin ólshedi, sıgnal ártúrli saýda pavılondarynda 22-den 35%-ǵa deıin kórsetkishti qurady. Negizi, esepteý mashınalary bolmasa, áýeli, tártip buzýshylyq úshin eskertpe ǵana alsań, ekinshi ret aıyppul salynady. Shaǵyn kásipkerlik sýbektileri úshin aıyppul mólsheri - 15AEK (37 875 teńge), orta kásipke - 30 AEK (75 750 teńge), iri sharýashylyqqa - 50 AEK (126 250 teńge).

«Qazaqtelekom» AQ qostanaılyq fılıalynyń ókilderi kásipkerlerge óz qarjylaryna arnaıy antennalar satyp alýdy usyndy. Alaıda satýshylar qosymsha shyǵyndalǵysy kelmeıdi, óıtkeni osy jaǵdaıda olardyń kinási joq.

Nátıjesinde keńeske qatysýshylar ár satýshyǵa jekeleı kóńil bólý kerektigi týraly sheshim qabyldady. Barlyǵy qujatpen rásimdelýi úshin ár kásipker «Qazaqtelekomǵa» býtıkte ólshemderdi alý boıynsha ótinish jazady. Ary qaraı máseleni Kásipkerler palatasy jáne Memlekettik qyzmet isteri departamenti baqylaýyna alady.