Baıanaýyldyq turǵyn týrısterge qoıan etin jeńsik as retinde usynbaq
ASTANA. QazAqparat - Baıanaýyl aýdanynyń Qarajar aýylynda qoıandar aýlalardy erkin kezip júr, dep habarlaıdy pavlodarnews.kz. Janýarlardy kútip-baǵýmen jergilikti mektepte bıologııa jáne hımııa pániniń ustazy bolyp jumys isteıtin Saltanat Temirbaeva otbasymen birge aınalysady.
- Bastapqyda joldasymnyń aǵasy bir analyq jáne atalyq qoıan syıǵa tartqan, - deıdi Saltanat Temirbaeva. - Onyń óziniń jeke fermasy bar. Sol jerde qoıan ósirýmen aınalysady, biraq ıtter maza bermeı qoıǵan. Eki jyldyń ishinde eki qoıannyń sany 37-ge deıin kóbeıdi. Olardyń jartysyn ózimiz soıyp jedik. Adam densaýlyǵy úshin qoıan etiniń paıdasy zor. Qazirgi kúni barlyǵy 20 qoıan qaldy.
Ustazdyń aıtýynsha, joldasy Nurlan Súleımenov mal qorasynyń ishinen janýarlarǵa arnap jyly oryn jasap bergen. Degenmen kóbeıetin kezde olar ózderine in qazyp alyp, kójekterin kózderin ashqanǵa deıin adamdarǵa kórsetpeı jasyryp qoıatyn kórinedi. Tipti, qyzǵanyshtan balalaryn jep qoıatyn kezderi de bolǵan. Jylyna eki ret 8-9 kójekten beredi.
- Tonyna qarap olardyń eresek jáne jas ekenin ajyratýǵa bolady, - deıdi Saltanat Temirbaeva. - Mysaly, eresek qoıandardyń mamyǵy qalyń keledi. Balalarmen birge kókónister - sábiz, qyryqqabat, shóp jáne jem beremiz. Tamaqtandyratyn mezgildi biledi. Birden júgirip keledi.
Saltanat Temirbaeva bolashaqta Myrzashoqy taýynda iske qosylǵan taý-shańǵy bazasynda ashylatyn dámhanaǵa keletin týrısterge qoıan etin jeńsik as retinde usynýdy kózdep otyr.
Mamandardyń sózine súıensek, bıologııalyq qunarlylyǵy óte joǵary qoıan eti dıetalyq etke jatady. Sondyqtan balalar men qart kisilerdiń as mázirinde mindetti túrde qoıan eti bolý kerek. Bul ettiń kolorııasy óte tómen. Mysaly, 100 gramm ette 156 kılokolorıı bolady. Pisirip, qýyryp, marınadtaǵan kezde de onyń kolorııasy nebári 176 kılokolorııdi quraıdy.
Buǵan qosa, qoıan eti salmaq qostyrmaıdy.
