Baıanaýyldaǵy jazǵy lagerde balalar kıiz úıde turyp jatyr
PAVLODAR. QazAqparat - Pavlodar oblysynda balalardyń jazǵy demalysyn tıimdi uıymdastyrý maqsatynda ártúrli úlgidegi 700-deı lager jumys istep tur, dep habarlaıdy QazAqparat 24.kz silteme jasap.
Onyń ishinde tildik, týrıstik-ólketaný, etno-mádenı, ıntellektýaldy, sporttyq sharalar bar. Osy maqsatta 285,2 mıllıon teńge qarastyrylǵan. Degenmen, bıylǵy jyldyń jańalyǵy Baıanaýyl aýdanyndaǵy «Jas dáýren» oqý-saýyqtyrý ortalyǵy janynan ashylǵan «Qazaq Samp» atty skaýttyq joba. «Qazaq Samp» ulttyq qundylyqtardy dáripteýge negizdelgen. Demalýshylar tabıǵatpen bite qaınasqan halqymyzdyń ejelgi turmys tirlishiligine qaıta oralady. Er balalar arasynda qamshy órýge qyzyǵýshylyq joǵary. Munyń tárbıelik máni de zor eken. Halqymyzdyń salty boıynsha uly on úshke tolǵanda ákesi topty jarsyn - dep tobylǵy qamshy ustatqan eken.
"Ata-babamyzdan qalǵan mura mynaý qamshy órýdi úıretý. Eń birinshiden, qamshy degenimiz ózi teriden ılenip, jasalady. Teri qalaı jasalady, mynaý bizde qulaqbaý deımiz , qulaqbaýdan taspa tilý, ony qyrnaý, ony juqartyp ózderine bárin úıretip, sosyn eń jeńili tórt taspadan jasaımyz" deıdi eńbek pániniń ustazy Nurjan Eleýuly.
Munda aǵashtan turmystyq buıymdar da jasalady. Astaý, etnoaýyl kórinisi, tabıǵı eskertkishter balalardyń qolynan shyqqan. Qyz balalar qazaqtyń ulttyq taǵamdaryn daıyndap úırenedi.
"Maǵan bári óte unaıdy.Biz bul jerde qazaqtyń ulttyq taǵamdaryn pisiremiz, kúndiz-túni bir-birimizben birgemiz jáne de altybaqanda terbelemiz. Bul jerdeı telefon, vaı-faı degen nárseler joq, ıaǵnı kóp sóılesemiz, taýǵa shyǵyp saıahattaımyz" deıdi oqýshy Aıdana Mahmutqyzy.
Kıiz basý, quraq kórpe tigip, syrmaq syrý. Jeti qazynaǵa jatatyn qyran qus pen qumaı tazy da osy «Qazaq Samp» baǵdarlamasyna engen. Aýdannyń qusbegileri balalarǵa saıatshylyq týraly áńgimeleıdi.
"Bul qusty endi ańǵa salamyn birinshiden ań úshin ustaımyz, qyzyq, ekinshiden, 2017 jyly Qazaqstan boıynsha bas júldeni alyp qaıtty. Pavlodar oblysynyń atyn shyǵaryp, qorǵap. Bul qustyń aty Naızatuıaq" deıdi qusbegi Ersin Qojahmetov.
"Balalar kıiz úılerde jatady. Ol basynn bastap sheshilgen másele. Árıne balalardy kıiz úıde jatqyzý úshin ata-analarynyń ruqsatyn aldyq. Shuǵyldanatyn jumystary balalar úıirmelermen aınalysady jáne de skaýt qozǵalysy bolǵannan keıin skaýt jumystarymen aınalysady" deıdi «Jas dáýren» jazǵy saýyqtyrý lageriniń basshysy Nursaǵat Ermekov.
Bir aýysymda 30 bala demalyspen qamtylǵan oqý-saýyqtyrý lageri qazir úshinshi maýsymyn bastap ketti. Bul jerde uzdik oqýshylarmen qatar áleýmettik az qamtylǵan jáne kóp balaly otbasylardyń balalary da demalyp jatyr. Bilim basqarmasy keleshekte «Qazaq Samp» respýblıkalyq, tipti halyqaralyq dárejede uıymdastyrylady degen mindet qoıyp otyr.
