Baıanaýyldaǵy órt eldi mekenderge qaýip tóndirgen joq – QR TJK
NUR-SULTAN. QazAqparat – Pavlodar oblysynyń ákimi Bolat Baqaýov men oblystyq Tótenshe jaǵdaılar departamentiniń bastyǵy Ernur Ótegenov órt shyqqan oryndy tikushaqpen aralap shyqty, dep habarlaıdy QazAqparat tilshisi.
«Pavlodar oblysynyń ákimi Bolat Baqaýov men oblystyq Tótenshe jaǵdaılar departamentiniń bastyǵy Ernur Ótegenov órt shyqqan orynǵa monıtorıng júrgizý maqsatynda QR TJK «Qazavıaqutqarý» qyzmetiniń MI-171 bortymen aralap shyqty. Tikushaqpen aralaý barysynda ormandy-dala órtiniń turǵylyqty oryndarǵa qaýip tóndirmeıtini anyqtaldy. Jaǵdaı baqylaýda», - dep habarlaıdy QR TJK baspasóz qyzmetinen.
Komıtettiń habarlaýynsha, shamamen órt aýmaǵy 93 gektar alqapty sharpyǵan.
«Órtti sóndirýge memlekettik organdardan, ulttyq park pen erikti órt sóndirý qurylymdarynan 500 adam men 120 arnaıy tehnıka jumyldyryldy. Adam aıaǵy jetpeıtin qıyn tustardy sóndirýge QR TJK-nyń «Qazavıaqutqarý» qyzmetiniń tikushaǵy jumyldyryldy», - dep habarlaıdy komıtetten.
Eske sala ketsek, Baıanaýyl ulttyq parkindegi alapat órttiń aýyzdyqtalǵany búgin tańerteń habarlanǵan bolatyn. Oqys oqıǵadan eshkim zardap shekpegen.
