Baıanaýylda Sultanmahmut Toraıǵyrovtyń 125 jyldyǵy toılanýda
PAVLODAR. QazAqparat - Baıanaýylda Sultanmahmud Toraıǵyrovtyń 125 jyldyǵyna oraı qurylǵan etnoaýylda 27 kıiz úı tigildi, dep habarlaıdy QazAqparat pavlodarnews.kz-ke silteme jasap.
Baıanaýyl aýdany Toraıǵyr aýylynda ótken toıǵa 3 myńǵa jýyq adam jınaldy. Pavlodar oblysynyń 13 aýdany men qalalary árqaısysy bir kıiz úıden tikti. Toı qonaqtary úshin altybaqan ornatylyp, merekelik saýda-sattyq uıymdastyryldy. Qazaqtyń ulttyq oıyndary - qazaqsha kúres pen toǵyzqumalaqtan saıys ótkizildi.
Demalys kúnderin Baıanaýyl taýlarynda ótkizýge bel baılaǵandardyń qatarynda Pavlodardan ózge de oblystyń turǵyndary boldy.
«Toı týraly dostarymyzdan estidik, - deıdi qaraǵandylyq Qaıyrbek Jolamanov. - Biz oılanbastan osy jaqqa bet aldyq. Barlyǵy unap jatyr. Sultanmahmud Toraıǵyrov - aqyn ǵana emes, qazaqtyń mańdaıyna bitken baǵy. Tarıhı tulǵany týǵan jerinde ulyqtap, muralaryn qasterlep saqtap otyrǵandary qýantady».
Toı qonaqtary baýyrsaq pen qymyzdan dám tatty. Qazaqtyń umyt bola bastaǵan 50 taǵamyn qalypqa keltirgen etnograf Áıgerim Mýsaǵajınovanyń aıtýynsha, qazaqtyń as máziri et pen baýyrsaqtan ǵana turmaıdy.
«Ulttyq taǵamnyń túri kóp. Bizdiń qalypqa keltirgen ár retseptimizdiń óz maǵynasy bar. Mysaly, er adamdar ǵana daıyndap, ózderi qorektenetin taǵam túri bar. Ózge taǵamdar otbasyndaǵy baılanysty kórsetedi. Mysaly, anasy men qyzynyń, enesi men kelininiń qarym-qatynasyn bildiretin as-aýqat barshylyq»,-deıdi «Halyq qazynasy» ǵylymı-zertteý ortalyǵynyń qyzmetkeri.
Aqynnyń mereı toıyna oraı Sultanmahmud Toraıǵyrovqa jyr joldaryn arnaǵan jazba aqyndar arasynda músháıra ótken bolatyn. Atalmysh baıqaýdyń jeńimpazdary onlaın daýys berý nátıjesinde anyqtalyp, etnoaýyldyń basty sahnasynda esimderi ataldy. Bas júldege Shyǵys Qazaqstan aqyny Raýan Qabıdoldın qol jetkizdi. Birinshi oryn shymkenttik Batyrhan Sarsenhanǵa buıyrdy. Ekinshi oryndy astanalyq Qarlyǵash Qabaı men Umtyl Zaryqqanuly bólisti. Úshinshi orynǵa almatylyq Aıdana Maısarbekqyzy, kókshetaýlyq Qaırat Seıtqazın jáne pavlodarlyq Jarqynbek Amantaı taban tiredi.
