Baıanaýylda Oljabaı jáne Jasybaı batyrlarǵa eskertkish ornatylady

BAıANAÝYL. QazAqparat – Pavlodar oblysynyń Baıanaýyl aýdanynda Oljabaı jáne Jasybaı batyrlarǵa eskertkish ornatylady. Bul týraly 2020 jyldyń qorytyndysy boıynsha turǵyndarǵa onlaın formatta esep bergen aýdan ákimi Qanat Kárimov aıtty, dep habarlaıdy QazAqparat Ravlodarnews.kz saıtyna silteme jasap.

«Bıylǵa josparlanǵan eń basty aýqymdy jumystyń biri – demeýshiler tarapynan Sátbaev - Baıazıtov kósheleriniń qıylysynda mádenı demalys saıabaǵyn salý. Saıabaqqa bólingen aýmaq aýdan ortalyǵyna kireberiste ornalasqan jáne uzaq jyldar boıy paıdalanylmaı, bos jatqan sazdy jer. Bul jer jeke turǵyn úı men ǵımarat qurylysyn salýǵa qolaısyz. Soǵan baılanysty aýdan ortalyǵyn kórkeıtý, abattandyrý maqsatynda saıabaq salý jobasy qolǵa alyndy. Joba aýdandyq «Aqsaqaldar alqasy», «Qoǵamdyq keńes» múshelerimen jan-jaqty talqylanyp, qoldaýǵa ıe boldy», - dedi Qanat Kárimov.

Aýdan ákiminiń aıtýynsha, saıabaqtyń aýmaǵy 2,6 gektardy quraıdy. 564 túp aǵash otyrǵyzylyp, 678 sharshy metr gúlzar egiledi, jaıaý júrginshilerge arnalǵan 2596 sharshy metr jolaq tóseledi. Balalarǵa arnalǵan oıyn alańdary men jastardyń vorkaýt alańy bolady. 108 dana saıabaq shamy, júzden astam oryndyq ornatylady. Saıabaq demalýshylaryna arnalǵan kólik turaǵy uıymdastyrylady.

«Saıabaqtyń ortasynda esimderi ańyzǵa aınalǵan, jerimizdi jaýdan qorǵap qalǵan batyr babalarymyz – Oljabaı jáne Jasybaı batyrlarǵa arnalǵan eńseli eskertkish ornatylady. Eskertkish qoladan quıylady, tuǵyrymen qosa eseptegende jalpy bıiktigi - 26,5 metr. Bul saıabaq aýdan turǵyndary men qonaqtary úshin eń kórnekti oryndardyń biri bolmaq. Joba aıasynda dámhana, qoǵamdyq dárethana salýdyń perspektıvasy qarastyrylǵan. Demalýshylar, otbasymen, dostarymen, týǵan-týystarymen kelip, taza aýamen tynystap, rýhanı demalyp qaıtatyn bolady», - deıdi aýdan ákimi.