Baıanaýylda mektep jylyjaıyndaǵy kókónister pisip jatyr
PAVLODAR. QazAqparat - Ótken jyldyń qarasha aıynda Sh.Aımanov atyndaǵy mekteptiń jylyjaıynda alǵash ret qııar men qyzanaq otyrǵyzylǵan bolatyn. Búginde sol kókónis pisti, dep habarlaıdy pavlodarnews.kz.
Bilim ordasynyń basshysy Saltanat Dosmaǵambetovanyń aıtýynsha, búgingi kúni «mırında» surypty 12 keli qııar alynǵan. Izraıldik tamshylatyp sýarý ádisin qoldanýdyń nátıjesinde bir saǵattyń ishinde ósimdiktiń tamyryna eki lıtrdeı sý barady jáne mundaı tásil sýdy únemdeýge múmkindik beredi.
«Jylyjaı 2010 jyly mekteptiń irgetasy qalanǵanda salynǵan, - deıdi Saltanat Dosmaǵambetova. - Bastapqyda temperatýranyń óte joǵary, ystyq bolýyna baılanysty kókónister qýrap kete beretin. Ótken jyly kúzde mektepke kelgen tájirıbesi mol bıolog Qarlyǵash Smaǵulova jylyjaıdaǵy artyq batareılerdi alyp tastap, retke keltirýdi usyndy. Budan keıin tájirıbe negizinde qyzylsha men qııar otyrǵyzdyq».
Áleýmettik jobany júzege asyrý aıasynda 8-synyp oqýshysy Bahtııar Molganjanov jylyjaıda jumys isteýge nıet bildirgen.
«Mundaǵy basty maqsat - balalardy kásipkerlikpen aınalysýǵa úıretý, eńbekke baýlý, - deıdi mektep dırektory. - Bul kókónister jaryqty kóp qajet etedi. Basynda táýlik boıy jaryq janyp turatyn. Keıin tek túngi mezgilde ǵana jaryq qosý kerek ekenin bildik. Sondaı-aq, túrli aýrýlarǵa qarsy óńdeý jumystary júrgizilip turady. Mamyr aıyna deıin baqylaý jasap kóremiz. Bizdiń negizgi tutynýshylarymyz - ustazdar. Saýdadan túsken qarajatqa tuqym men tyńaıtqyshtarǵa jumsalǵan shyǵyn óteledi jáne artylǵan qarajat balanyń eńbegine tólenedi».
Bolashaqta aýmaǵy 12h5 metrdi quraıtyn jylyjaıdy keńeıtýge qarjy tabylǵan jaǵdaıda basqa da kókónister men jemisterdi otyrǵyzý josparda bar.
Aıta keteıik, búgingi tańda atalmysh bilim ordasynda 446 bala bilim alyp júr.
