Baıanaýylda kıik atty degen kúdikpen Germanııa azamaty ustaldy
ASTANA. QazAqparat - Baıanaýyl aýdanynda kıik atyp aldy degen kúdikpen tórt azamat ustaldy, dep habarlaıdy pavlodarnews.kz.
Bul týraly óńirlik kommýnıkatsııalar qyzmetinde ótken baspasóz máslıhatynda oblystyq orman sharýashylyǵy jáne janýarlar dúnıesi aýmaqtyq ınspektsııasynyń basshysy Qazbek Ámetov málim etti.
- 2018 jyly 12-tamyzda «Ohotzooprom» mekemesiniń Baıanaýyl tirek pýnkti men oblystyq aýmaqtyq ınspektsııanyń memlekettik ınspektorlary birlesken shara júrgizý barysynda Maıqaıyń kenti mańynda «Daewoo Matiz» kóligin ustaǵan, - deıdi Qazbek Ámetov. - Kólikte Aqsý qalasynyń 1990, 1992, 1987 jylǵy úsh turǵyny men 1985 jylǵy Germanııa eliniń azamaty bolǵan. Tekserý kezinde bir kıik pen polıetılen paketke oralǵan eki tegis oqpandy qarý, 13 dana gılza anyqtaldy. Atalmysh faktige qatysty Baıanaýyl ishki ister bólimi QR Qylmystyq kodeksiniń 337-baby, 1-bólimine sáıkes qylmystyq is qozǵady. Qazirgi tańda sotqa deıngi tergeý júrgizilde.
Budan basqa, ınspektsııa basshysy byltyr qazan aıynda Baıanaýyl tirek pýnktiniń qyzmetkerleri tabıǵatty qorǵaý polıtsııasymen birge Maı aýdanynda eki kıikti atyp alý faktisin tirkegenin atap ótti.
- Bul iske qatysy bar Aqsý qalasynyń eki turǵyny ustaldy, - deıdi Qazbek Ámetov. - «Toyota Surf» kóligin tekserý barysynda eki tegis oqpandy qarý men 84 oq, atyp alynǵan janýarlar anyqtalǵan. Nátıjesinde 6,8 mıllıon teńge shyǵyn keltirilgen. Maı aýdandyq sotynyń sheshimimen 2018 jyly 4-qańtarda eki azamat kináli dep tanylyp, QR Qylmystyq Kodeksiniń 337-baby, 4-bólimi, 2-tarmaqshasy boıynsha úsh jylǵa bas bostandyǵyna shekteý qoıylyp, úsh jyl ańshylyqpen aınalysýǵa tyıym salyndy. Zańsyz tapqan olja men qarý, avtokólik memlekettiń paıdasyna qaraı tárkilendi. Inspektsııa azamattyq tártippen janýarlar álemine keltirilgen 6 mıllıon 807 myń teńge shyǵyndy toltyrý týraly aryz jiberdi.
