Baıanaýylda Qanysh Sátbaevtyń 120 jyldyǵyna arnalǵan respýblıkalyq jyr músháırasy ótti

PAVLODAR. QazAqparat - Baıanaýyl aýdanynda geolog-ǵalym, mınerologııa ǵylymdarynyń doktory, professor, qazaqtan shyqqan tuńǵysh akademık Qanysh Sátbaevtyń 120 jyldyǵyna arnalǵan respýblıkalyq aqyndar músháırasynyń jeńimpazdaryn marapattaý rásimi ótti, dep habarlaıdy pavlodarnews.

Baıanaýyl aýdandyq ákimdigi uıymdastyrǵan jyr dodasyna 20-dan astam aqyn qatysty. - Músháıranyń maqsaty – ult tarıhyna, qazaq ǵylymyna, óneri men mádenıetine ólsheýsiz úles qosqan uly tulǵa Qanysh Sátbaevtyń adamdyq bolmysy men eleýli eńbegin nasıhattaý, sol arqyly óskeleń urpaqty eli men jerin súıýge, otanshyldyqqa tárbıeleý, - dedi ákimdikte. – Músháıra erejesi boıynsha 16-35 jas aralyǵyndaǵy aqyndar úsh óleń joldaýy kerek boldy. Birinshi óleń Qanysh Sátbaevqa arnalsa, ekinshi óleń - Baıanaýyl týraly jáne úshinshi óleń eldik, erlik, órlik taqyrybyndaǵy patrıottyq óleń bolýy tıis. Eki aıǵa jalǵasqan jyr báıgesine aqyn, Qazaqstannyń eńbek sińirgen qaıratkeri, Halyqaralyq «Alash» syılyǵynyń ıegeri, Qanysh Sátbaev týraly estelikter toptastyrylǵan «Zańǵar» kitabynyń qurastyrýshysy, Baıanaýyl aýdanynyń Qurmetti azamaty, «Juldyz» jýrnalynyń bas redaktory Ǵalym Jaılybaı, aqyn, Qazaqstannyń eńbek sińirgen qaıratkeri, Halyqaralyq «Alash» ádebı syılyǵynyń ıegeri, Qazaqstan Jazýshylar odaǵy Pavlodar oblystyq fılıalynyń dırektory Arman Qanı jáne aqyn, «Naızatas» jýrnalynyń bas redaktory Asyl Ábish qazylyq etti. Qazylar alqasynyń sheshimimen bas júldege qaraǵandylyq Jánibek Álıman ıe boldy. Birinshi oryndy Nur-Sultan qalasynan Oljas Qasym enshilese, ekinshi orynǵa Balqash qalasynan Aıdyn Baıys pen túrkistandyq Muqaǵalı Kenjetaıuly laıyq dep tanyldy. Júldeli úshinshi oryn Shyǵys Qazaqstannan Serikjan Qajytaıǵa, baıanaýyldyq Jolaman Áıtken jáne Baıanaýyl aýdany Shomankól aýylynan Musabek Seısenbekulyna buıyrdy. Sonymen qatar, ekibastuzdyq Raýan Qaıdar oblystyq «Naızatas» ádebı-kórkem, qoǵamdyq-saıası jýrnalynyń arnaıy júldesin, Ertis aýdanynan Baqbergen Darıǵauly aýdandyq «Baıantaý» gazetiniń arnaıy júldesin enshiledi. Qatysýshylar men júldegerlerge qarjylaı syılyqtar tabystaldy.

Músháıra qatysýshylary akademık Q.Sátbaevtyń memorıaldyq murajaıynda saqtalǵan qundy jádigerlermen tanysyp, baıanaýyldyq oqyrmandarmen kezdesti. Baıanaýyl aýylyndaǵy «Danalar dańqy» alleıasyna saıahat jasady.