Baıanaýylda barymtashylar sottaldy
PAVLODAR. QazAqparat - Baıanaýyl aýdanynda barymtashylar sottaldy. Olardyń biriniń merzimi polıtseıge qaýip-qater tóndirgeni úshin uzartyldy, dep habarlaıdy QazAqparat Pavlodarnews.kz saıtyna silteme jasap.
Baıanaýyl aýdandyq soty baspasóz qyzmetiniń málimeti boıynsha, eki jergilikti turǵyn iri jáne asa iri kólemde urlyq jasaǵany úshin sottaldy. Sondaı-aq, olardyń birine bılik ókiline qatysty kúsh qoldandy degen aıyp taǵyldy.
Sot anyqtaǵandaı, 2018 jyldyń 3 maýsymynda belgisiz tulǵalarmen aldyn ala sóz baılasý arqyly sottalǵandardyń biri 5,6 mln teńgege 18 jylqy urlaǵan.
Al 2019 jyldyń 5 shildesinde sottalǵandar quny 2,6 mln teńge bolatyn jeti jylqyny urlap ketken.
2019 jyldyń 9 qyrkúıeginde 18 jylqyny urlaǵan adam qyzmettik mindetterin atqaryp júrgen polıtsııa qyzmetkerinen jasyrynýǵa tyrysyp, kúsh qoldaný arqyly pyshaqpen qorqytqan.
Prokýror oǵan qatysty urlyq jasaǵany jáne polıtsııa qyzmetkerine qaýip tóndirgeni úshin 9 jyl 6 aıǵa bas bostandyǵynan aıyrýdy, al ekinshi mal urlyǵyna qatysty bar adamǵa 3,5 jyl taǵaıyndaýdy surady.
Birinshi sottalýshy kinásin ishinara, al ekinshisi tolyq moıyndady. Ekeýi de ózderin bas bostandyǵynan aıyrmaýdy surady.
- Nátıjesinde qylmystyń aýyrlyǵy men birneshe ret jasalǵanyn eskere otyryp, birinshi aıyptalýshyǵa ortasha qaýipsizdik mekemesinde 8 jyl bas bostandyǵynan aıyrý jazasy taǵaıyndaldy. Al ekinshisi jábirlenýshige keltirilgen zalaldy tolyq ótegenin jáne bes balany (olardyń bireýi múgedek) ózi jalǵyz baǵyp otyrǵanyn eskerip, probatsııalyq baqylaýdy belgileı otyryp, 4 jylǵa bas bostandyǵyn shekteý taǵaıyndaldy, - delingen vedomstvo habarlamasynda.
