Baıanaýylda asyq atý sportynan Qazaqstan chempıondary anyqtaldy
NUR-SULTAN. QazAqparat – Pavlodar oblysy Baıanaýyl aýdanynda asyq sporty oıynynan ardagerler arasynda Qazaqstan Respýblıkasynyń chempıonaty ótti, dep habarlaıdy QazAqparat.
Baıanaýyl aýdanynda asyq atýdan ótken chempıonatqa ulttyq oıynnan 60 surmergen ózara synǵa tústi.
Bıylǵy chempıonatta komandalyq esepte erler arasynda Qostanaı, Nur-Sultan, Soltústik Qazaqstan oblysynan kelgen sportshylar top jardy. Al qyzdar arasyndaǵy bestas oıynynda Qostanaı, Qyzylorda jáne elorda komandasy alǵashqy úsh oryndy ózara bólisti.
«Ótken jyly mundaı chempıonat Shyǵys Qazaqstan oblysy Qatonqaraǵaı aýdanynda ótken edi. Bıylǵy ardagerler arasyndaǵy jarys ótken jylǵymen salystyrǵanda joǵary deńgeıde boldy. Asyqshylardyń sheberlikteri jyl saıyn kóterilip, mergendikteri arta túsken», - deıdi Nur-Sultan qalasy asyq federatsııasynyń prezıdenti Eskendir Rahmetov.
Sondaı-aq, asyq atýdyń ardagerleriniń arasynda aqmolalyq Naýan ımam jaqsy oıyn kórsetti. Aýyl ımamy Balýan Sholaq atyndaǵy Ulttyq sport túrleriniń jasóspirimder sport mektebinde eki jyl jattyǵyp júr.
