Baıanaýylda 50 dombyrashy bir mezette «Ata tolǵaýy» kúıin oryndaıdy - Pavlodar oblysy
Bul týraly aýdandyq ishki saıasat bóliminiń basshysy Talǵat Qalyshbekov málim etti, dep habarlaıdy pavlodarnews.kz.
- Qusbegilerdiń legin Shyǵys Qazaqstan oblysy Aıagóz qalasynda ótken HІ respýblıkalyq «Qansonar-2017» chempıonatynyń jeńimpazy Baqytjan Muqashev pen elimizge belgili búrkitshi Imanzaıyp Tasybaev bastaıdy. Olardyń sońynan ergen 50 dombyrashy bir mezette Nurǵısa Tilendıevtiń "Ata tolǵaýy" kúıin oryndaıdy. Bul kúni jergilikti mekeme-uıymdardyń demeýshiligmen 300 lıtr naýryz kóje men 100 keli baýyrsaq, palaý tegin taratylady. Ásirese, turmysy tómen, jetim jáne az qamtamasyz etilgen otbasylarǵa erekshe kóńil bólinedi. Budan basqa, jyldaǵy dástúr boıynsha ulttyq sport oıyndary men merekelik saýda-sattyq ótedi, - deıdi Talǵat Qalyshbekov. Bólim basshysynyń aıtýynsha, bilim berý ordalary men ákimdiktiń bólimderi Sultanmahmut Toraıǵyrov, Álkeı Marǵulan, Júsipbek Aımaýytov syndy belgili jerlesteriniń atymen atalatyn 10 kıiz úı turǵyzady. Onyń ishinde bıyl alǵash ret aýdandyq málıhattyń depýtaty Oral Sartaevtyń bastamasymen kásipkerler jeke kıiz úı tigýge nıet bildirgen.
