Baıanaýyl ulttyq saıabaǵynyń tarıhı oryndary boıynsha týrıstik karta jasaldy
Baıanaýyldyń álemge tanylýynyń sebebin óz kózderimen kórip qaıtý úshin Pavlodar oblysyna Pavlodardan, Astanadan, Óskemen men Barnaýyldan kvadrotsıklmen ekstremaldy týrızmdi unatatyndar jınaldy. Olardyń barlyǵy kvadrotsıkldarmen, qarda júretin kóliktermen saıahattaýshylar klýbtarynda tirkelgen jáne Qazaqstan men Reseıdiń kóptegen qyzyqty oryndarynda bolǵan.
Kvadrotsıklshylar pavlodarlyqtarmen birge qazaq kınosynyń negizin qalaǵan Sháken Aımanovtyń týǵan jerine, Shona bı men aqyn Sultanmahmut Toraıǵyrovtyń qystaqtaryna, sondaı-aq aty ańyzǵa aınalǵan Kempirtas jartasyna bardy. 
Saıahat Mádenıet qyzmetkerleri kúnine arnaldy. Sondyqtan oǵan Pavlodar oblysynyń ákimi Bolat Baqaýov ta qatysty.
Ekspedıtsııa Toraıǵyr aýylynda da boldy. Munda Qazaqstandaǵy energetıkalyq ǵylymnyń negizin qalaýshy Shafık Shokın dúnıege kelgen. Shokın - tehnıkalyq ǵylymdar doktory, professor, QazKSR Ǵylym akademııasynyń akademıgi.
Qonaqtar Jasybaı kólindegi Abylaıhan ordasyna bardy. Ekspedıtsııadan odan ári 1915 jyly Baıanaýyl aýdanynda týǵan akademık Ermahan Bekmahanovtyń týǵan jerine attandy. Bekmahanov - belgili ǵalym-tarıhshy, Qazaqstannyń tarıhı ǵylymdarynyń tuńǵysh doktory, professor, akademık.
Jasybaı kóliniń ortalyq jaǵajaıynda ekspedıtsııa qatysýshylaryna jazǵy maýsymda uıymdastyrylatyn sporttyq jáne ózge de sharalar jaıynda áńgimelendi. Ol jerden qonaqtar jońǵarlarǵa qarsy shaıqasqan, aty ańyzǵa aınalǵan qazaq batyry Jasybaıdyń beıit basyna bardy.
Saıahat Sabyndykól III qorymy janynda aıaqtaldy.
Ekspedıtsııa marshrýty boıynsha týrıstik karta jasaldy. Endigide barlyq nıet bildirýshiler Baıanaýyl aýdanynyń tarıhı, arheologııalyq oryndaryna jaıaý jáne at ústinde saıahatqa shyǵa alady.
