Baıanaýyl ulttyq parkinde orman órtenip jatyr
NUR-SULTAN. QazAqparat – Aýdan ortalyǵynan on shaqyrym jerde toǵyz gektardan astam aýmaq otqa orandy, dep habarlaıdy pavlodarnews.kz.
Baıanaýyl memlekettik ulttyq tabıǵı parkindegi órt 14 shildede bastaldy.
«№ 83 2,5 ga ýchaskede saǵat 19:25-te aýyzdyqtaldy, ıaǵnı ot sóndirildi, biraq tútin qaldy. Sol jerde kórshi № 73 ýchaskede toǵyz gektarda 22:12-de qyzyl jalyn aýyzdyqtaldy. Keshe tústen keıin № 73 ýchaskede órt shyqty. Bul taýly ormandy jerler, - dep habarlady Baıanaýyl aýdany ákimi apparatynyń TJ bas ınspektory Saıat Qabdıev.
Saıat Qabdıev aıtyp ótkendeı, ázirge órt alańy men onyń sebepteri týraly naqty aqparat joq.
«Bul Baıanaýyl aýylynan on shaqyrym jerde ornalasqan. Jasybaıdaǵy demalys aımaqtarynan otpen qamtylǵan aýmaqty Sabyndykól kóli, taýlar, joldar bóledi, bul shamamen 25 km. Órtti sóndirý jónindegi shtab órtten bir shaqyrym jerde ornalasqan. Órt sóndirýge 78 adam men 20-ǵa jýyq arnaıy tehnıka qatysady. Aýdan ákimdigi adamdar, tehnıka, janarmaı berip kómektesýde», - dedi S.Qabdıev.
Búgin saǵat 11:10-da eki Mı-8 tikushaǵy jumys isteı bastady, bireýi aýmaqty patrýldeıdi, ekinshisi 2,5 myń tekshe sýmen órt sóndiredi. Órt ornynda Baıanaýyl memlekettik tabıǵı parkiniń, aýdandyq ákimdiktiń, oblystyq orman jáne janýarlar dúnıesi aýmaqtyq ınspektsııasynyń, oblystyq órt sóndirý jáne avarııalyq-qutqarý jumystary qyzmetiniń qyzmetkerleri bar.
