Baıanaýyl parkinde qur atqan brakonerler ustaldy
ASTANA. QazAqparat - Pavlodar oblysyndaǵy Baıanaýyl ulttyq tabıǵı parkinde qur atqan brakonerler ustaldy, dep habarlaıdy QazAqparat Pavlodar oblysynyń ІІD-niń silteme jasap.
«Reıd barysynda «Sapsan» respýblıkalyq jedel otrıady tártip saqshylarymen birge Kúrkeli aýyldyq okrýginiń ormandy alqabynan ÝAZ markaly kólikti kórip qalyp, toqtatqan. Kólik 42 jastaǵy aýyl turǵyny basqarǵan. Salonda odan bólek taǵy eki adam bolǵan. Tekserý kezinde kólikten atylǵan jabaıy qur, IJ markaly 12 kalıbrli tirkelmegen qarý jáne 32 oq, búkteletin pyshaqtyń bary anyqtalǵan», - delingen habarlamada.
Qazirgi ýaqytta atalǵan jaǵdaıǵa qatysty QR QK-niń 187-baby boıynsha sotqa deıingi tergeý amaldary bastaldy.
Aıta ketsek, Baıanaýyl memlekettik ulttyq tabıǵı parki, elimizdiń qorǵalatyn tabıǵı aýmaqtardyń biri. Ulttyq parkte qustardyń 50-den astam túri men ańnyń 40 túri bar. Park aýmaǵynda arqar, elik jáne tıin ańdarymen birge, búrkit, aqqý sııaqty sırek kezdesetin jáne joıylyp ketý qaýpi bar qustar mekendeıdi.
