Baıanaýyl memlekettik ulttyq parkiniń aýmaǵynda órt shyqty
Bul týraly oblystyq tótenshe jaǵdaılar departamentiniń baspasóz qyzmeti málimdedi.
«Órt týraly 16:39-da habarlama kelip tústi. Onda Baıanaýyl-Qaraǵandy avtojolynyń boıynda KamAz avtokóliginen ot shyqqany týraly aıtyldy. Oqıǵa ornyna 4 qyzmetker men bir órt sóndirý tehnıkasy shyqty», - delingen habarlamada.
Tótenshelikter oqıǵa ornyna jetkende jalyn Baıanaýyl memlekettik ulttyq parkiniń aýmaǵyna ótip úlgergen. Onda ulttyq parktiń jalpy aýmaǵy 0,22 ga jeri otqa oranǵan. Munda qurǵaq shóp pen aǵashtar janǵan.
Al júk kóliginiń kabınasy janyp ketken. Oqıǵa ornyna qosymsha taǵy bir órt sóndirý tehnıkasy jiberildi. Jalyn saǵat 17:20 aýyzdyqtaldy.
Aıta ketelik, órtti sóndirýge ulttyq parktiń 15 mamany men 5 tehnıkasy jumyldyryldy.
Qazirgi tańda keltirilgen shyǵyn men sebebi anyqtalýda.