Baıanaýyl kýrorttyq aımaǵyndaǵy áýejaı qurylysy aıaqtalýǵa jaqyn
ASTANA. QazAqparat - Pavlodar oblysynyń Baıanaýyl kýrorttyq aımaǵyndaǵy áýejaı qurylysy aıaqtalýǵa jaqyn, dep habarlaıdy Qazaqstan Respýblıkasy Investıtsııalar jáne damý mınıstrliginiń Azamattyq avıatsııa komıteti.
«Tartylǵan ınvestıtsııalar esebinen uzyndyǵy 1200 m jáne eni 21 m bolatyn ushý-qoný jolaǵy salyndy. Sondaı-aq, jýyq arada jolaqqa shyǵý joldary men peron salynyp, elektrmen qamtamasyz etý nysandarynyń jáne aerodromnyń qorshaý jumystary aıaqtalady. Jolaýshylardyń jaılylyǵy úshin aýdany 200 sharshy metr ǵımarat salynǵan. Tikushaqtyń qonýyna arnalǵan eki alań daıyndaldy» delingen habarlamada.
Málimetke saı, qazirgi ýaqytta «Qazaeronavıgatsııa» RMK-nyń mamandary Baıanaýyl aerodromyna ushýdy baqylaýdyń mobıldi ortalyǵyn ornatý boıynsha jumystardy júrgizýde. Meteorologııalyq jabdyqtardy, radıonavıgatsııalyq quraldardy jáne baılanys júıelerin ornatý sharalary da qarastyrylǵan.
Buǵan deıin habarlanǵandaı, kelesi týrıstik maýsymda Astana-Baıanaýyl, Almaty-Baıanaýyl, Pavlodar-Baıanaýyl reısterin ashý josparlanyp otyr. Joǵaryda kórsetilgen baǵyttarda aımaqtyq avıatsııanyń ushaqtaryn paıdalaný kózdelinip otyr.
