Baıanaýyl aýdanynyń týrıstik klasterin damytýǵa 3 mlrd teńge bólingen - Pavlodar oblysy
ASTANA. QazAqparat - Bıyl Baıanaýyl aýdanynyń týrıstik klasterin damytýǵa 3 mlrd teńgege jýyq qarajat bólingen.
Bul týraly Pavlodar oblysyndaǵy týrızmdi damytý máselelerin qaýzaǵan brıfıng barysynda Baıanaýyl aýdany ákiminiń orynbasary Ádilhan Ábeýov aıtty, dep habarlaıdy pavlodarnews.kz .
Bul somaǵa Toraıǵyr, Sabyndykól, Jasybaı kólderiniń aýmaǵyndaǵy joldardy jóndeý, jaryqtandyrý júıesin qurý, jaǵajaıdy kóriktendirý jumystary júrgizilgen. Sonymen qatar, Toraıǵyr men Jasybaı arasyndaǵy joldy jóndeýdiń konkýrsy bastalyp, 1 aı aralyǵynda jańa asfalt tóselmek. - Baıanaýyldaǵy týrıstik oryndar saıahatshylarǵa Túrkııadan da artyq qyzmet kórsetpek. Bizdiń aýdandaǵy týrıstik áleýetke on baldyq shkala boıynsha 8-9 ball qoıar edim. Osy oraıda Baıanaýyldy jazǵy ǵana emes, qysqy demalys aımaǵyna aınaldyrý josparda bar. Myrzashoqyda arqan jolyn ornatyp, bıylǵy qysqa deıin qoldanysqa beremiz. Memleket óz tarapynan ınfraqurylymdy júrgizedi, al ınvestorlar servıstik qyzmetti óz moınyna alady. Sondaı-aq, Sabyndykóldiń aýmaǵyn damytýǵa ınvestorlar qajet, - dedi Á.Ábeýov.
Ákimniń orynbasary Baıanaýyldaǵy týrızmniń basty problemalaryn da atady. Olar - respýblıkalyq mańyzdaǵy joldardyń jóndeý kórmeýi, ınfraqurylymnyń nasharlyǵy, qoǵamdyq tamaqtaný oryndaryn uıymdastyrýdyń kemshilikteri. Oblystyq kásipkerlik, saýda jáne týrızm basqarmasy basshysynyń orynbasary Oksana Davydenkonyń aıtýynsha, Baıanaýyldan bólek Tuzaqala, Shaldaı, Maraldy kóline jáne Ertis ózenine týrısterdi tartý boıynsha jumystar atqarylýda.
