Baıanaýyl aýdanyndaǵy órttiń taralý qaýpi joq – Vladımır Bekker
NUR-SULTAN. QazAqparat – QR Tótenshe jaǵdaılar komıtetiniń tóraǵasy Vladımır Bekker Baıanaýyl aýdanyndaǵy órt jaǵdaıynyń ahýalyn baıan etti, dep habarlaıdy QazAqparat tilshisi.
«Keshe Baıanaýyl aýdanynda tabıǵı órttiń bes oshaǵy sónbeı jatqan edi. Eń irisi – Baıanaýyl ulttyq tabıǵı parkinde boldy. Búgin tańerteń saǵat segizde maǵan órt oshaǵynyń tek ekeýi qalǵanyn baıandady. Keshe qansha aýmaqtyń órtenip jatqany týraly aqparat kóp bolǵanymen, búgin tikushaqpen tóbeden qaraǵannan keıin 93 ga aýmaqtyń órtenip jatqany rastaldy. Arnaıy komıssııa órt aýmaǵynynyń naqty qanshalyqty ekenin anyqtaıdy», - dedi Vladımır Bekker elordada ótken baspasóz máslıhatynda.
Onyń aıýynsha, órt belgili bir aýmaqty alyp ketken. Alaıda onyń taralý qaýpi joq.
«Sol órtengen aýmaqtyń ishinde jeke usaq oshaqtar bar. Ol jerge tehnıka jete almaıdy. Ol órtterdi tikushaqpen sóndirýge tyrysýdyń qajeti joq. Órt sóndirýshiler jaıaý 20 lıtrlik sýdy alyp baryp, tilsiz jaýmen kúresip jatyr. Baıanaýyl ulttyq parkindegi alapat órttiń aýyzdyqtalǵany búgin tańerteń habarlanǵan bolatyn. Qaza bolǵandar men zardap shekkender joq. Odan bólek, oqıǵa ornyna shaqyrylǵan órt sóndirýshilerdiń jartysyn qaıtaryp jiberdik. Sebebi, olardyń bárin jumyldyrý qajet emes. Sondyqtan, órt sóndirýshiler jetpeı jatyr eken degen áńgime negizsiz», - dedi ol.
Eske sala ketsek, Baıanaýyl ulttyq parkindegi alapat órttiń aýyzdyqtalǵany búgin tańerteń habarlanǵan bolatyn. Oqys oqıǵadan eshkim zardap shekpegen.
Pavlodar oblysynyń ákimi Bolat Baqaýov pen oblystyq Tótenshe jaǵdaılar departamentiniń bastyǵy Ernur Ótegenov órt shyqqan oryndy tikushaqpen aralap shyqty. TJK buǵan deıin Baıanaýyldaǵy órt eldi mekenderge qaýip tóndirgenin jarııa etken.
