Baıanaýyl aqyndarynyń jyr jınaǵy jaryqqa shyqty
ASTANA. QazAqparat- Baıanaýyl aýdanynda «Baıan jyr» dep atalatyn aqyndar antologııasy oqyrman qaýymǵa jol tartty, dep habarlaıdy pavlodarnews.kz.
Baıanaýyl aýdandyq «Baıantaý» gazetiniń tilshisi, atalmysh jańa jınaqtyń qurastyrýshysy Elaman Hasenulynyń sózinshe, kitapqa 45 jasqa deıingi 21 aqynnyń óleńder toptamasy engen.
«Bul kitap «Alash» partııasynyń 100 jyldyq mereıtoıyna jáne el Egemendiginiń 26 jyldyǵyna arnalyp otyr. Sodan keıingi taǵy bir maqsatymyz - Elbasymyz usynǵan «Týǵan jer» baǵdarlamasyn júzege asyrý. Qurastyrýdy osydan alty aı buryn qolǵa alǵan edik. Sodan beri óńirimizdegi 40-tan asa aqynjandy azamattar men azamatshalardyń óleń-jyrlaryn jınappyz. Biraq, kórkemdigi tómen shyǵarmalardy jarııalaýǵa júreksindik, - deıdi Elaman Hasenuly.
Kitapqa qazirgi tańda Baıan óńirinde turatyndardyń ǵana emes, osynda týyp qyzmet baby boıynsha Almaty, Astana, Qaraǵandy, Pavlodar qalalarynda júrgen shaıyrlardy da toptastyrǵan eken. Óleńderi tańdalyp alynǵan 21 avtordyń qatarynda Asyǵat Turǵanbek, Janargúl Qadyrova, Tańat Ahatov, Baǵdat Dúısenov, Aspanbek Shuǵataev syndy elge tanylǵan aqyndar bar. Al, eń kishisi - 16 jasar Raýshan Amankeldiqyzy.
Jyr jınaq aýdan ákimdiginiń qoldaýymen jáne aýdandyq mádenıet jáne tilderdi damytý bóliminiń demeýshiligimen shyqty.
Elamannyń sózinshe, bul Baıanaýyl aqyndar antologııasy serııasymen jaryqqa shyqqan alǵashqy jınaq. Bolashaqta Buqar Jyraý, Máshhúr Júsip, Sultanmahmuttardan bastap, qazirgi kúni el arasynda júrgen tanymal aqyndardyń qalamynan týǵan shyǵarmalarynyń basyn qosyp, taǵy bir úlken ádebı jınaq qurastyrýdy josparlap otyr.
