Baıanaýyl aerodromy 2018 jyly tolyq paıdalanýǵa beriledi
ASTANA. QazAqparat - Baıanaýyl aerodromy 2018 jyly tolyqtaı paıdalanýǵa beriledi. Bul týraly búgin Ortalyq kommýnıkatsııalar qyzmetindegi brıfıngte Pavlodar oblysynyń ákimi Bolat Baqaýov málim etti, dep habarlaıdy QazAqparat
«Baıanaýyl tabıǵı parkiniń tartymdylyǵyn arttyrý maqsatynda taý shańǵy trassasy salynyp, Jasybaı kóliniń jaǵajaıy abattandyryldy, sýburqaq salyndy. Shaǵyn avıatsııa arnalǵan aerodrom salynýda. Aǵymdaǵy jyly Maraldy kólinde jańa týrıstik maýsym ashylyp, Altaı ólkesiniń ıArovoe kýrortty aımaǵyna básekelestik jasady. Jazǵy maýsymnyń shyrqaý sheginde bul kólde kúnine 2,5 myńnan astam adam dem aldy», - dedi Bolat Baqaýov.
Onyń aıtýynsha, kelesi jyly Baıanaýyl baǵytynda eki avıakompanııa reısterdi jolǵa qoıýdy josparlap otyr.
«Men taıaýda ǵana eki adamdyq ushaqpen baryp qaıttym. Búginde ol jerde shaǵyn ushaqtardy qabyldaýǵa daıynbyz. Aerodrom qorshalǵan. Kútý ǵımaraty salynyp jatyr. Kelesi jyly ol Astana-Baıanaýyl, Qaraǵandy-Baıanaýyl jáne Pavlodar-Baıanaýyl baǵyttarynan shaǵyn ushaqtardy qabyldap, jumysyn bastaıdy. Bastapqy eki baǵdar respýblıkalyq bıýdjetten, al ishki reıs oblys bıýdjetinen sýbsıdııalanatyn bolady. ushýlardy júzege asyrýǵa 2 avıakompanııa daıyn», - dedi oblys basshysy.
Óńir basshysynyń sózine qaraǵanda, bıyl Baıanaýyl aýdanyn damytýǵa 5 mlrd teńgeden astam qarjy jumsalǵan.
«Bul respýblıkadaǵy ortalyq sýmen qamtamasyz etý júıesi tartylmaǵan jalǵyz aýdan bolatyn. Aǵymdaǵy jyly sý qubyrynyń qurylysyn bastap, joldardy jaryqtandyrýdy júrgizýdemiz, oramishilik joldar da jóndelip jatyr. Munan bólek 110 orynǵa arnalǵan jańa balabaqshanyń qurylysy aıaqtalýǵa taıaý», - dedi ol.
