Baıanaýylǵa erekshe mártebe qashan beriledi – Úkimet basshysynyń jaýaby

ASTANA. KAZINFORM – Premer-Mınıstr Oljas Bektenov Májilis depýtattarynyń Baıanaýylǵa biregeı tarıhı, ǵylymı jáne týrıstik áleýeti bar aýmaq retinde erekshe mártebe berýge qatysty saýalyna jaýap berdi. 

Úkimet basshysynyń atap ótýinshe, qazirgi ýaqytta qoldanystaǵy zańnamada «ǵylymdy qajetsinetin aýmaq» túsinigi men anyqtamasy qarastyrylmaǵan. Qazaqstanda ǵylymdy qajetsinetin aýmaqtar qurýmen baılanysty máselelerdi sheshý maqsatynda Májilis depýtattary «Qazaqstan Respýblıkasynyń keıbir zańnamalyq aktilerine ǵylymdy qajetsinetin aýmaqtar máseleleri boıynsha ózgertýler men tolyqtyrýlar engizý týraly» QR zańy jobasyna bastamashylyq jasaǵan.

- Zań jobasy «ǵylymdy qajetsinetin aýmaq» túsinigin engizýdi, onyń ishinde jergilikti atqarýshy organdardyń ǵylymdy qajetsinetin aýmaqtardy damytýdyń keshendi josparyn ázirleýin, kelisýin jáne bekitýin, sonymen qatar ókiletti organǵa eldi mekenge ǵylymdy qajetsinetin aýmaq mártebesin berýdi usynýyn, Joǵary ǵylymı-tehnıkalyq komıssııada atalǵan ǵylymdy qajetsinetin aýmaq úshin basym ǵylymı baǵyttardy aıqyndaýyn kózdeıdi. Úkimettiń zań jobasyna qorytyndysy Májiliske engizildi. Joǵaryda aıtylǵandy eskere otyryp, Baıanaýyl aýdan ortalyǵyna ǵylymdy qajetsinetin aýmaq mártebesin berý máselesi tıisti zań jobasy qabyldanǵannan keıin ǵana qarsastyrý múmkin bolady dep esepteımin, - dedi Premer-Mınıstr.

Aıta keteıik, Baıanaýylǵa biregeı tarıhı, ǵylymı jáne týrıstik áleýeti bar aýmaq retinde erekshe mártebe berý kerek. Bul týraly Premer-Mınıstrge saýal joldaǵan Májilis depýtaty Nıkolaı Arsıýtın aıtty.