Baıanaýylǵa aqqýlar jıi ushyp kelip jatyr

PAVLODAR. KAZINFORM - Baıanaýyl ulttyq tabıǵı parkiniń dırektory Ajdar Júsipov sý aıdyndaryna aqqýlar jıi ushyp kelip jatqanyn habarlady. Qustar sybyrlaq aqqý túrine jatady.

- Aqqýlardy bizdiń mekemeniń ınspektorlary baıqaǵan. Ásirese, Dalba ormanshylyǵynyń Kúrkeli aýyldyq okrýgi aýmaǵynda sybyrlaq aqqýlardyń jyldaǵydan kóptigi baıqalady. Sybyrlaq aqqýlar elimizde keń taraǵan, kóbine qalyń qamysty-qoǵaly iri kólderin mekendeıdi. Bizdiń Baıanaýyl jerinde Qyzyl kitapqa engen qıqyldaq aqqý da kezdesedi. Jalpy ulttyq park aýmaǵynda qaýyrsyn qanattylardyń 205 túri bar bolsa, sonyń 9-y Qyzyl kitapqa engen, - deıdi park basshysy.

Ornıtologtardyń aıtýynsha, sybyrlaq aqqýdyń (Cygnus olor) turqy irileý, salmaǵy 14 kelige deıin bolady. Túsi aq, tumsyǵy – qyzyl, onyń ústinde qara shor baıqalady. Jas qustar qońyr-sur tústi. Júzgende moınyn latynnyń S árpi túrinde ıip ustaıdy. Ushyp bara jatqanda alystan qanattarynyń yrǵaqty sýsyldaǵan dybysy estiledi. Osy ereksheligi arqyly suńqyldaq aqqýdan erekshelenedi ári sońǵysynyń tumsyǵy sary-qara, shor bolmaıdy.Qazaqstannyń barlyq sýqoımalarynda kezdesedi.

Eske sala keteıik, byltyr Baıanaýylǵa jyly jaqtan aqqýlar naýryz aıynda ushyp kele bastaǵan.