Baıanaýyldyq órt sóndirýshiler ájesi men eki nemeresin qutqardy
PAVLODAR. KAZINFORM - Órt sóndirýshiler janyp jatqan úıden 1954 jylǵy ájeı men onyń eki nemeresin aman alyp shyqty. Taǵy bir bala aýrýhanaǵa jatqyzyldy.
Baıanaýyl aýylyndaǵy Izbastın kóshesinde bes bólmeli kirpish úıge japsarlas salynǵan jazǵy as úı órtendi. Aǵash ǵımarat pen negizgi ǵımarattyń tóbesi otqa oranyp, órttiń jalpy aýdany 60 sharshy metrdi quraǵan.
- Oqıǵa ornyna qutqarý bólimsheleri jedel jetti. Mamandardyń úılesimdi jáne kásibı áreketteriniń arqasynda úıdiń terezesi arqyly úsh adam qutqaryldy. Olar -1954 jyly týǵan múgedek áıel, 2017 jáne 2020 jyly týǵan eki bala. Sondaı-aq, órttiń saldarynan 2009 jyly týǵan bala aýrýhanaǵa jetkizildi, - dep habarlady óńirlik tótenshe jaǵdaılar departamentinen.
Órtti joıýǵa Pavlodar oblysy tótenshe jaǵdaılar departamentiniń órt sóndirýshileri men Baıanaýyl ulttyq parkiniń qyzmetkerleri qatysqan. Sondaı-aq oqıǵa ornynda polıtsııa, jedel medıtsınalyq kómek jáne BRES energetıkteri de jumys istegen.
Eske sala keteıik, Ertis ózeniniń jaıylmasynda qurǵaq shóp pen qamys órtendi.