Baıanaýyldaǵy jasyl ormandar jupsyz jibek kóbeleginen zııan shegip jatyr
PAVLODAR. KAZINFORM - Qazir ormanshylar túkti jándikterge qarsy óńdeý sharalaryna kirisken. Jupsyz kóbelektiń qurttary qaıyń jáne kókterekke tússe, japyraǵyn túk qaldyrmaı jep qoıady.
Bul týraly Baıanaýyl memlekettik ulttyq tabıǵı parkinen habarlady.
«Baıanaýyl MUTP aýmaǵynda jupsyz jibek kóbeleginiń oshaqtary bar. Jupsyz jibek kóbelegi – qurttary qaıyń men kókterek japyraqtaryn jeıtin orman zııankesteri. BMUTP qyzmetkerleri Semeı SP mamandarymen birlesip orman patologııalyq monıtorıngin júrgizedi. Aýrý qurǵaq aýa raıynyń saldarynan paıda bolady. Qazirgi ýaqytta bıologııalyq kúres sharalary qolǵa alyndy. Atap aıtqanda, qus uıalary ornatylyp, qumyrsqalardyń ıleýi tasymaldanyp jatyr. Al Baıanaýyl bólimshesiniń 23, 33-oramdarynda ulttyq park qyzmetkerleri kóbelek qýyrshaqtaryn kerosınmen ýlap, joıyp jatyr», - dep málimdedi ulttyq parkten.
Zańǵa sáıkes, erekshe qorǵalatyn tabıǵı aýmaqtardaǵy zııankesterge qarsy hımııalyq ádis qoldanýǵa tyıym salynǵan. Sondyqtan ormanshylar tek bıologııalyq óńdeý ǵana júrgize alady. Jupsyz jibek kóbeleginiń álegi sońǵy eki jylda Pavlodar oblysynyń barlyq ormanshylyǵynda baıqalyp otyr.