Baıanaýyldaǵy týrıstik oryndarda qaraqurt qaptap ketti

PAVLODAR. KAZINFORM - Baıanaýyl memlekettik ulttyq tabıǵı parkiniń mamandary qaýipti jándiktiń dernásilderin qolmen jınap jatyr. Bıylǵy maýsym basynan beri qaraqurttyń 245 analyǵy joıylǵan.

Bıylǵy mamyr aıynda park qyzmetkerleri Toraıǵyr kóliniń mańyndaǵy tastaq jerlerden qaraqurt jumyrtqalaryn tapqanyn, demek jaz maýsymynda qaýipti jándiktiń qaıta shyǵý yqtımaldyǵy bar ekeni týraly habarlaǵanbyz.

Mekemeniń ǵylym jáne monıtorıng bóliminiń basshysy Dınara Kúnshýaqovanyń aıtýynsha, qaraqurt ulttyq park aýmaǵynda byltyrdan beri baıqalǵan. Ásirese Toraıǵyr kóliniń mańynda kóbeıip ketken.

«Ulttyq park aýmaǵy aıryqsha qorǵalatyn jer bolǵandyqtan munda hımııalyq óńdeýge tyıym salynǵan. Mamandarymyz qaraqurttyń jumyrtqalaryn izdep taýyp, birden joıyp otyrady. Analyqtaryn sol jerde janshyp, órtep qurtamyz. Mamyr aıynan beri 245 qaraqurtty joıdyq», - deıdi ol.

Orman ınspektorlary kórikti ólkege kelip jatqan týrısterge saq bolýdy eskertip otyr. Deıturǵanmen bıyl adamdardy qaraqurt shaqqany jaıly derek tirkele qoıǵan joq.

Eske sala keteıik, Atyraý oblysynda qaraqurt shaqqan 485 túıeniń toqsany ólgen.