Baıanaýyldaǵy Toraıǵyr kóli ashyq aspan astyndaǵy muz aıdynyna aınalyp keledi

PAVLODAR. KAZINFORM -  Jelide Toraıǵyr kóliniń qysqy kórinisi týraly beınejazbalar tarap jatyr. Adamdar tabıǵattyń ásem qoınaýyndaǵy kól ústinde konkı teýip, alǵan áserin bólisip jatyr.

Baıanaýyldaǵy Toraıǵyr kóli qysqy serýendi unatatyndar úshin ashyq aspan astyndaǵy muz aıdyny retinde taptyrmas orynǵa aınalyp otyr. Sý betindegi muz birkelki qatqany sonshalyq, oǵan baryp konkı tebýden lázzat alǵandar ózderiniń áseri jaıly áleýmettik jelide jarysa jarııalap jatyr. Mundaǵy muz óte berik ári móldir.

Toraıǵyr kóli – Jasybaı demalys aımaǵyna jaqyn jerde, áıgili demokrat aqyn Sultanmahmut Toraıǵyrovtyń kesenesi janynda ornalasqan. Jazda kól sýy bıik quzdy shyńdardyń túbinen tolqyndana jarysa shyǵyp, jaǵaǵa soǵylady. Tústik jıeginde úshkir basty bıik shyń Naızatas tur. Aqtar qazaqqa qysymshylyq kórsetken tarshylyq zamanda bul shyńnyń qatpar tastary arasyna Sáken Seıfýllın jasyrynyp, aman qalǵan. Kóldiń bir shetinde ashyq beti sýǵa qaraǵan Úńgirtas úńireıedi.

Toraıǵyrda tabıǵattyń ǵylymı ındıkatory - Qyzyl kitapqa engen qandyaǵash ósedi. 

Sondaı-aq buǵan deıin Baıanaýylda qysqy týrızm ashylǵany týraly jazǵanbyz.