Baıanaýyldaǵy Toraıǵyr aýmaǵynda taǵy qaraqurt shyǵyp jatyr
PAVLODAR. KAZINFORM - Baıanaýyl ulttyq parkiniń ǵylymı qyzmetkerleri Toraıǵyr kóliniń soltústik-shyǵysyndaǵy tastaq jerlerden qaraqurt jumyrtqalaryn tapqanyn málimdedi. Demek jaz maýsymynda qaýipti jándiktiń qaıta shyǵý yqtımaldyǵy bar.
Baıanaýyl memlekettik ulttyq tabıǵı parki jáne Toraıǵyr aýyldyq okrýginiń aýmaǵynda, Jasybaı bólimshesiniń 6-shy oramynda qaraqurttyń jumyrtqalary tabyldy.
- Qaýipti jándikter Toraıǵyr kóliniń soltústik tasty jaǵajaıynda shamamen 2-3 shektar jerdi jaılaǵan. Ázirshe bizdiń qyzmetkerlerimizge qaraqurttyń analyqtary kezdesken joq. Jándikterdiń ózi qysta tastardyń qýysyna kirip jan saqtaıdy da, kún jylyna jer betine shyǵady. Jumyrtqalary kún ysyǵanda jaryla bastaıdy. Aıryqsha qorǵalatyn jer bolǵan soń park aýmaǵynda hımııalyq óńdeýge ruqsat joq. Jumyrtqalaryn qolmen jınap, qutyǵa salyp órtep jiberemiz. Joıý jumystary aldaǵy kúnderi júrgiziledi, - deıdi ulttyq parktiń ǵylym jáne monıtorıng bóliminiń ǵylymı qyzmetkeri Murat Jasulan.
Qaraqurt osymen ulttyq parkten tórtinshi jyl qatarynan tabylyp otyr. 2024 jyly Baıanaýyldaǵy týrıstik oryndarda qaraqurt qaptap ketken edi.
Sol jyldyń tamyz aıynda qaraqurt qaptaýyna baılanysty Baıanaýylda tabıǵı sıpattaǵy tótenshe jaǵdaı jarııalandy.
Al 2025 jyly qaraqurt Toraıǵyr kóliniń aýmaǵynda shamamen 30 gektar jerdi jaılaǵany týraly jazǵanbyz.
