Baıanaýyldaǵy Sabyndykól jaǵalaýy zamanǵa saı abattandyrylady

PAVLODAR. KAZINFORM - Baıanaýyldaǵy Sabyndykól mańaıyn aldaǵy ýaqytta zamanǵa saı abattandyrý josparlanyp otyr. Munda Pavlodar qalasyndaǵy Ortalyq jaǵajaıdaǵydaı aǵashtan jasalǵan joldar, kúnnen qorǵaıtyn shatyrlar, aǵash shezlongtar, dýsh pen kıim aýystyratyn oryndardy ornalastyrý kózdelgen.

Taýly ólkege aǵylyp kelip jatqan týrısterdiń kóptigi eskerile otyryp, kóldiń negizgi jaǵajaıyna sholý alańyn ornalastyrý kózdelgen. Keleshekte bul aýmaq Jasybaı demalys aımaǵy sııaqty zamanaýı demalys ornyna aınalýy ǵajap emes. 

«Taǵy bir joba - Baıanaýyl aýylyndaǵy Sabyndykól kóliniń jaǵajaı aımaǵyna kire beris jerde sholý alańyn salý. Bul jerde bolashaqta zamanǵa saı jaǵajaı paıda bolady. Jobalaýshylar Pavlodardaǵydaı jaıly da ádemi ınfraqurylymdar salýdy kózdep otyr. Sondaı-aq Baıanaýylda kovorkıng pen konferentsııalarǵa arnalǵan arnaıy kabınetter, mýltımedııalyq murajaı jáne t.b. ornalasatyn vızıt-ortalyqtyń qurylys jobasy da daıyn tur», - dep habarlady óńirlik ákimdiktiń baspasóz qyzmetinen.

Eske sala keteıik, Baıanaýylda bir demde 5 myń adam demala alatyn 50-den asa týrıstik nysan bar.