Baıanaýyldaǵy mýzeıge Taısııa Sátbaeva ustaǵan jádiger tapsyryldy
PAVLODAR. KAZINFORM - Akademık Q.I.Sátbaevtyń Baıanaýyl memorıaldyq mýzeıine Qanysh Imantaıulynyń jubaıy Taısıa Sátbaevanyń jumysta qoldanǵan mıkroskoby tapsyryldy.
Qundy jádigerdi Meıiz Sátbaevanyń perzenti, geolog ǵalym Aleksandr Tretıakov syıǵa tartqan.
Qazirgi ýaqytty akademık Q.I.Sátbaevtiń Baıanaýyl memorıaldyq mýzeıiniń qorynda barlyǵy 3749, onyń ishinde negizgi qorda 2087 jádiger bar. Jádigerlerdiń kóbi kitaptar men kartınalar.
- Mýzeıimiz memorıaldyq ıaǵnı, jeke tulǵanyń atynda bolǵandyqtan, ǵalymnyń qoly tıgen, ózi ustaǵan zattarynyń bul kúnde kelýi óte az. Soǵan qaramastan mýzeı ujymy ǵulamanyń týystary men kózin kórgen adamdarǵa habarlasyp, únemi tyń derekter men jádigerlerdi izdep taýyp, mýzeıge ákelip jatyr. Jýyqta mýzeıimizdiń basshysy Qaıyrgeldi Abylǵazın Astana qalasyna barǵan saparynda Qanysh Imantaıulynyń jubaıy Taısıa Sátbaevanyń jumysta qoldanǵan mıkroskobyn alyp keldi. Atalǵan qundy jádigerdi Meıiz Sátbaevanyń perzenti, geolog ǵalym Aleksandr Tretıakov syıǵa tartypty, - deıdi mýzeıdiń qor saqtaýshy mamany Sansyzbaı Sapaǵarǵalıev.
Mıkroskop 1961 jyly jasalǵan, T.Sátbaeva ony óz jumysynda, geologııalyq zertteýler júrgizgen kezde qoldanǵan eken. Keıin qyzy, geologııa - mınerologııa ǵylymdarynyń doktory, ǵalym Meıiz Qanyshqyzy qoldanypty. Jádiger mýzeıdegi ekspozıtsııalyq zalǵa ornalastyryldy.
Eske sala keteıik, akademık Qanysh Sátbaevtiń Baıanaýyldaǵy memorıaldyq mýzeıinde taý tulǵanyń er-toqymy saqtalyp tur.
Byltyr Pavlodarda Qanysh Sátbaev pen Kemel Aqyshevtiń birge túsken fotosýretteri tabyldy.
Sondaı-aq qazaq dalasynan ken izdegen Qanysh Sátbaevqa ańshylar qalaı kómekteskeni týraly jazǵan edik.