Baıanaýylda jol jaǵalaı júgirgen arqar kadrǵa túsip qaldy
PAVLODAR. KAZINFORM – Baıanaýyl memlekettik ulttyq tabıǵı parki aýmaǵynda sırek kezdesetin janýar – arqar kameraǵa ilikti. Janýardyń jol jaǵalaı júgirip, erekshe minez-qulyq tanytqany jeli qoldanýshylarynyń qyzý talqysyna túsýde.
Arqar – elimizdiń «Qyzyl kitabyna» engen jabaıy janýar. Pavlodar oblysynda olardyń sanynyń arta túsýi kóńil qýantady. Ádette arqarlar adamdardan alys, bıik taýlardyń qoınaýynda júredi jáne kamera obektıvine sırek túsedi.
Bul jolǵy qyzyq kórinis Baıanaýyl ulttyq parkiniń aýmaǵynda túsirilgen. Jergilikti bloger Aman Júsipbaev janýardyń jol jıegindegi tor qorshaýdy jaǵalaı júgirgenin kadrǵa iliktirdi.
- Ulttyq tabıǵı park aýmaǵynda jol ústinde kútpegen jerden arqardy kezdestirip, osy erekshe sátti vıdeoǵa túsirý baqyty buıyrdy, - dep jazdy bloger.
Ulttyq park mamandarynyń aıtýynsha, Baıanaýyl óńirinde 800-ge jýyq arqar bar. Olar únemi taýly aımaqtarda tirshilik etip, taý shyńdarynda jaıylady. Arqarlardyń kúıleý kezeńi qazan–qarasha aılarynda ótedi. Bul ýaqytta atalyqtary men analyqtary birge jaıylady. Al basqa mezgilderde atalyqtary bólek júredi.
Eske sala keteıik, Baıanaýyl ormandarynda alǵash ret quný kózge tústi.
