Baıanaýylda ulttyq parkke qarasty jerler órtenip jatyr
PAVLODAR. KAZINFORM — Pavlodar oblysynyń Baıanaýyl ulttyq parkinde taýly jerler órtenýde. Jalyndy aýyzdyqtaýǵa barlyǵy 80-nen astam adam men 30 tehnıka jumyldyrylǵan.
Baıanaýyl aýdanynyń taýly jerinde tabıǵı órt shyqty. Kýágerlerdiń aıtýynsha, órt Qaraǵandy oblysy jaqtan kelgen.
— Órtti sóndirýge Tótenshe jaǵdaı mınıstrliginiń kúshteri men quraldary, Janatilek pen Qaratomar aýyldaryndaǵy aýyl qutqarýshylarynyń beketteri, Baıanaýyl ulttyq parki men «Ertis ormany» qyzmetkerleri, Baıanaýyl aýylynyń erikti qurylymdary, sondaı-aq «Qazavıaqutqarý» áýe kemesi jumyldyryldy. Barlyǵy 80-nen astam adam men 30 tehnıka tartylǵan, — dep habarlady QR Tótenshe jaǵdaılar mınıstrliginen.
Mınıstrlik ókilderi órtti sóndirý jáne irgeles aýmaqty qorǵaý úshin úsh ýchaske men jedel shtab qurylǵanyn málim etti. Sondaı-aq sóndirý jumystary qatty jelge, taýly jer bederine jáne aýmaqtyń jetýi qıyn bolýyna baılanysty qıyndap turǵanyn habarlady.
Baıanaýyl ulttyq parkiniń dırektory Almas Jumashev órtke oranǵan jerler ulttyq parktiń aýmaǵyna tıesili ekenin rastady. Ázirshe órtengen aýmaqtyń kólemi belgisiz.
Eske salaıyq, buǵan deıin Ertis ózeniniń jaıylmasy órtengenin jazǵanbyz.
