Baıanaýylda ulttyq parkke qarasty jerler órtenip jatyr
PAVLODAR. KAZINFORM — Tilsiz jaýdy sóndirýge óńirlik tótenshe jaǵdaılar, orman sharýashylyǵy qyzmetteri, Qazavıaormanqorǵaý jáne Jasybaı ormanshylyǵy kúshteri men quraldary jumyldyrylǵan.
Baıanaýyl aýdanyndaǵy Jasybaı ormanshylyǵynda órt tutanyp, boı bermeı jatyr. Órt sóndirýshiler ekpindi jel men qurǵap turǵan ósimdikter jalynnyń tez taralýyna sebep bolyp otyr deıdi. Jergilikti turǵyndar túsirgen beınejazbalardan baıqalǵandaı, órt Jasybaı demalys aımaǵynda, taýdaǵy qaraǵaı toǵaılaryna tarala bastaǵan.
— 4 sáýirde 112 pýltine Baıanaýyl aýdanynyń Jasybaı ormanshylyǵynda qurǵaq shóptiń órtengeni týraly habarlama kelip tústi. Órtti sóndirýge Tótenshe jaǵdaılar departamenti, orman sharýashylyǵy, Qazavıaormanqorǵaý jáne Jasybaı ormanshylyǵy departamentiniń kúshteri men quraldary dereý kiristi. Qazirgi ýaqytta órtti joıýǵa 70-ke jýyq adam jáne 20-dan astam tehnıka jumyldyryldy. Ekpindi jel men qurǵaq shóp jaǵdaıdy qıyndatyp tur. Jaǵdaı erekshe baqylaýda, - dep habarlady óńirlik tótenshe jaǵdaılar departamentinen.
Oqıǵa ornyna Pavlodar oblysy tótenshe jaǵdaılar departamenti basshylyǵy, sondaı-aq ákimdik ókilderi keldi. Tótenshe jaǵdaılar mınıstrligi jáne oblystyq tótenshe jaǵdaılar departamentiniń komandalyq ortalyǵynda jedel shtab quryldy. Órt ornyna qosymsha quramynda óńirlik tótenshe jaǵdaılar departamentiniń 38 qyzmetkeri men 11 tehnıka bar kolonna jiberilgen.
Eske sala keteıik, byltyr kúzde Baıanaýylda jer órtenip, bir aýyldyń turǵyndary qaýipsiz aýmaqqa kóshirilgen bolatyn.
Keıinirek, órt shalǵan jerlerdiń aýmaǵy 10 myń gektarǵa jetkeni anyqtaldy.