Baıanaýylda Toraıǵyr kóliniń jaǵajaıy abattandyrylady
PAVLODAR. KAZINFORM — Keler jyly týrısterge qolaıly bolýy úshin Toraıǵyr kóliniń jaǵajaıyn abattandyrý josparlanǵan. Joba memlekettik saraptamadan ótip, quny 867,9 mln teńgeni qurady.
Joba aıasynda kól mańaıyndaǵy 2,3 gektar aýmaq abattandyrylady. Jaǵajaıda fýtbol men voleıbol alańdary, balalar oıyn alańy, fýd-kort, eki sanıtarlyq torap, medıtsınalyq pýnkt, qutqarý munaralary men pırster salynady.
Sonymen qatar avtoturaqty keńeıtý jáne 35 shatyrdan turatyn demalys aımaǵyn qurý kózdelgen.
Óńir basshylyǵy merdigerdi anyqtaý rásimin kelesi jylǵa qaldyrmaı, bıyl bastaýdy uıǵaryp otyr. Bul qajetti jabdyqtardy aldyn ala qamdap, erte kóktemde qurylys jumystaryn jedel bastaýǵa múmkindik beredi.
Oblys ákimdiginen habarlaǵandaı, Baıanaýyldaǵy týrıstik ınfraqurylymdy damytý jumystary kezeń-kezeńimen jalǵasady. Buǵan deıin Sabyndykól jaǵalaýy abattandyrylyp, Jasybaı kóliniń jaǵajaıy tolyqtaı jańǵyrtylǵan. Búginde Jasybaı jaǵajaıynda 64 jappa, 438 shezlong, úsh kóleńkeli qalqa, eki fýd-kort, balalarǵa arnalǵan alańdar men fýtbol jáne voleıbol alańdary, dýsh jáne kıim aýystyratyn oryndar, sondaı-aq úsh sanıtarlyq torap ornatylǵan.
— Biz Sabyndykóldiń jaǵalaýyn abattandyrdyq, Jasybaı kóliniń jaǵajaıyn tolyqtaı jabdyqtadyq. Endi Toraıǵyrǵa kóńil bólý qajet. Eger jyl saıyn kezekpen bir-eki kóldi jańartyp otyrsaq, týrıster sany ári qaraı da ósedi, — dep atap ótti ákimdikten.
Toraıǵyrdan keıin óńirdegi ózge de demalys oryndaryn kezeń-kezeńimen jańǵyrtý josparlanyp otyr. Atap aıtqanda, Aqsý qalasyndaǵy eki jaǵajaıdy, sondaı-aq Maraldy jáne Tuzdykól kólderin abattandyrý máselesin qarastyrý tapsyryldy. Baıanaýyldaǵy týrıstik nysandarǵa jyl basynan 357 myńnan astam adam kelgen.
Buǵan deıin bir ǵana Jasybaı demalys ornynda ótken jazda 200 myńdaı týrıst demalǵanyn jazǵanbyz.
Sondaı-aq Baıanaýyldyq jeti keremeti týraly materıaldy oqı otyryńyz.
