Baıanaýylda tikushaqqa oq atyldy: quqyq qorǵaý organdary tergeý júrgizip jatyr
PAVLODAR. KAZINFORM — Pavlodar oblysynda ormandy qorǵaý jumystaryna paıdalanylatyn tikushaqtyń zaqymdaný deregi boıynsha quqyq qorǵaý organdary tergeý júrgizip jatyr. Aqparatty «Qazavıaormanqorǵaý» respýblıkalyq memlekettik qazynalyq kásiporny rastady.
Áleýmettik jelilerde oqıǵanyń Baıanaýyl ulttyq parkinde bolǵany týraly aqparat tarady.
Jarııalanym avtorlarynyń málimetinshe, jergilikti qyzmetkerlerdiń biri atys qarýyn qoldanyp, atylǵan oq tikushaqtyń quıryq bóligindegi tik turaqtandyrǵyshyna tıgen. Saldarynan áýe kemesiniń atalǵan bóliginde sańylaý paıda bolǵan.
«Qazavıaormanqorǵaý» kásipornynyń málimetinshe, 1 qarashada ormandy qorǵaý maqsatynda paıdalanylatyn áýe kemesinen zaqymdaný belgileri anyqtalǵan. Alaıda onyń naqty neden paıda bolǵany ázirge belgisiz.
— Atalǵan derek boıynsha materıaldar quqyq qorǵaý organdarynyń qaraýynda. Qazir oqıǵanyń mán-jaıy anyqtalyp jatyr. Tergeýge qatysty ózge de máseleler quqyq qorǵaý organdarynyń quzyretine jatady, — dep habarlady kásiporynnyń baspasóz qyzmetinen.
Oqıǵanyń sebepteri men tikushaqtyń qalaı zaqymdanǵany tergeý nátıjesinde belgili bolady.
Eske sala keteıik, Baıanaýyl ulttyq parkindegi orman órtin sóndirýge «Qazavıaormanqorǵaý» kásipornynyń tikushaǵy jumyldyryldy.
