Baıanaýylda taǵy órt shyǵyp, 30 gektar jer janyp ketti
PAVLODAR. KAZINFORM - Baıanaýyldyń Qaratomar aýyly mańynda dala órti boldy. Tilsiz jaý memlekettik orman qoryna zııanyn tıgizgen joq.
Baıanaýyl aýdanyna qarasty Qaratomar aýyly mańynda dala órti shyǵyp, jaıylymdyq jerlerdi jaıpap ketti.
- Órt ornyna tótenshe jaǵdaı departamentiniń kúshteri men quraldary, onyń ishinde spýtnıktik termınal, Qaratomar, Qundykól, Jańatilek aýyldarynyń órt sóndirý beketteri, erikti órt sóndirý qurylymdary, Baıanaýyl ulttyq parkiniń qyzmetkerleri dereý jiberildi. Órt memlekettik orman qoryna eshbir qaýip tóndirgen joq. Tilsiz jaý 3 saǵat ishinde sóndirilip, jalpy aýdany 30 gektar aýmaqty kúıik shalǵany anyqtaldy. Órt sóndirý jumystaryna barlyǵy 6 tehnıka men 18 adam, sondaı-aq avıabort tartyldy,-dep habarlady Pavlodar oblysy tótenshe jaǵdaılar departamentiniń baspasóz qyzmetinen.
Eske sala keteıik, 6 qazan kúni Baıanaýylda dalalyq alqap órtenip, bir aýyldyń turǵyndary qaýipsiz aýmaqqa kóshirildi.
Keıinirek, órt shalǵan jerlerdiń aýmaǵy 10 myń gektarǵa jetkeni anyqtaldy.
