Baıanaýylda «Saryarqa syry» zamanaýı vızıt-ortalyǵy ashyldy
ASTANA. KAZINFORM – Pavlodar oblysynyń Baıanaýyl aýdanynda Vizit Bayanaul «Saryarqa syry» zamanaýı vızıt-ortalyǵy ashyldy. Bul týraly Pavlodar oblysy ákimdiginiń baspasóz qyzmeti habarlady.
Saltanatty rásimge Pavlodar oblysynyń ákimi Asaıyn Baıhanov qatysyp, Baıanaýyldyń týrıstik áleýetin damytý memlekettik saıasattyń basym baǵyttarynyń biri ekenin atap ótti.
– Memleket basshysy Qasym-Jomart Toqaevtyń tapsyrmasyna sáıkes, biz Baıanaýyldyń áleýetin tolyq ashatyn jáne ony Qazaqstandaǵy týrızmniń mańyzdy ortalyqtarynyń birine aınaldyratyn zamanaýı týrıstik ınfraqurylymdy kezeń-kezeńimen qalyptastyryp kelemiz. Búgin biz jaı ǵana vızıt-ortalyqty emes, tarıh, mádenıet jáne rýhanı murany zamanaýı tehnologııalarmen ushtastyratyn ortalyqty ashyp otyrmyz. Bul – óńirdiń bolashaǵyna salynǵan ınvestıtsııa. Bizdiń maqsatymyz – Baıanaýyldy qaıta-qaıta kelgiń keletin mekenge aınaldyrý, – dedi Asaıyn Baıhanov.
Ákimdiktiń málimetinshe, Baıanaýyldaǵy týrıstik ınfraqurylymdy jańǵyrtý nátıjesinde kýrorttyq aımaq endi bir maýsymda 300 myńǵa deıin týrıst qabyldaı alady.
Jańa vızıt-ortalyq Baıanaýyl memlekettik ulttyq tabıǵı parkiniń negizgi aqparattyq jáne navıgatsııalyq ortalyǵy bolady. Munda týrıster týrıstik baǵyttar, tabıǵı kórikti jerler, kıeli oryndar men óńirdiń mádenı murasy týraly tolyq aqparat ala alady.
Aýmaǵy 740 sharshy metr bolatyn keshende týrıstik baǵyttardyń tsıfrlyq kartasy bar ınteraktıvti aımaq, mýzeı keńistigi, konferents-zal, kovorkıng, transformer-kitaphana, kofehana, ana men bala bólmeleri jáne demalys aımaqtary ornalasqan.
– Ortalyqtyń basty erekshelikteriniń biri – jasandy ıntellekt tehnologııalaryn qoldaný. Zamanaýı mýltımedııalyq sheshimder arqyly kelýshiler Baıanaýyldyń tabıǵaty, tarıhy jáne mádenı murasymen ınteraktıvti formatta tanysa alady, – delingen habarlamada.
Jobany iske asyrýǵa qosqan úlesi úshin Pavlodar oblysy ákiminiń Qurmet gramotasymen «Eýrazııalyq top» JShS-niń memlekettik organdarmen ózara is-qımyl jónindegi menedjeri Balym Gaıazova, YouthArt qalalyq damý qorynyń quryltaıshysy, Almaty qalalyq máslıhatynyń depýtaty Krıstına Bekmýrzaeva jáne «SMÝ-Astana LTD» JShS-niń dırektory Erkin Qaparov marapattaldy.
Sondaı-aq osy kúni belgili ólketanýshy, týrızm salasynyń úzdigi, «Elim-aı» syılyǵynyń laýreaty, Baıanaýyl aýdanynyń Qurmetti azamaty Altynbek Qurmanovtyń «Kóne Kóktaý ottary» atty kitabynyń tusaýkeseri ótti.
Avtor 25 jyldan astam ýaqyt boıy arhıv qujattaryn zerttep, tarıhı-mádenı eskertkishterdi zerdelep, kónekóz qarııalardyń estelikterin jınaqtaǵan. Bes bólimnen turatyn kitapta óńir tarıhy, sondaı-aq Máshhúr Júsip Kópeıuly, Qanysh Sátbaev, Álkeı Marǵulan jáne Ermuhan Bekmahanovtyń murasyna qatysty biregeı derekter qamtylǵan.
Іs-shara barysynda «Altyn dombyra» ıegeri Aspanbek Shuǵataev arnaý aıtyp, oǵan belgili ólketanýshylar, jazýshylar jáne qoǵam qaıratkerleri qatysty.
Jumys sapary kezinde Asaıyn Baıhanov Baıanaýyldyń kireberisinde ornatylǵan jańa stelamen de tanysty. Bıiktigi 30 metrlik sáýlettik nysanda salt atty beınesi, ulttyq oıý-órnek pen qazaq úıiniń kerege elementteri beınelengen. Sonymen qatar aýmaq tolyq abattandyrylyp, jaıaý júrginshiler joly salynyp, kógaldandyrý jumystary júrgizilgen.
Aıta keteıik, Qazaqstanda týrızmge salynǵan ınvestıtsııa 1,2 trln teńgeden asty.
