Baıanaýylda órtten jasóspirim kóz jumdy

Pavlodar oblysy Baıanaýyl aýdanynda jeke turǵyn úı órtendi. 2015 jylǵy er bala órtten qutqarylǵanymen, aýrýhanaǵa apara jatqanda kóz jumǵan, dep habarlaıdy Kazinform. 

Óńirlik Tótenshe jaǵdaılar departamentiniń baspasóz qyzmeti habarlaǵandaı, oqıǵa ótken túnde bolǵan.

«10 qańtar kúni saǵat 02:58-de Baıanaýyl aýdany Sátbaev aýylynda úı órtenip jatqany týraly habarlama kelip tústi. Órt sóndirýshiler oqıǵa ornyna jetkende 5 bólmeli gazoblokty úıde shatyrdyń aǵash bólikteri, úı zattary men jıhaz janyp jatqany anyqtaldy. Aldyn ala boljam boıynsha órttiń kólemi – 180 sharshy metr. Órt saǵat 6:25 mınýtta sóndirildi», - delingen habarlamada.

Oqıǵa kezinde úıde 6 adam bolǵan. Erli-zaıyptylar, omyraýdaǵy sábı, ájesi úıden óz betimen shyqqan. Іshte qalyp qoıǵan eki balany qutqarýǵa úı ıesiniń kórshi turatyn aǵasy umtylǵan. Alaıda órt órshı túskeni sebepti ony jáne úıde qalyp qoıǵan 2013 jylǵy qyz balany ýchaskelik polıtseı men kórshisi alyp shyqqan.

Al jergilikti órt sóndirý beketiniń qyzmetkerleri janyp jatqan úıden 2015 jylǵy er balany qutqardy. Ókinishke qaraı, jasóspirim aýrýhanaǵa bara jatqan jolda kóz jumdy.

Oqıǵanyń mán-jaıy anyqtalyp jatyr.