Baıanaýylda órtenip jatqan úıler kimge tıesili

PAVLODAR. KAZINFORM - Baıanaýyl aýdanynyń ákimdigi Jasybaı ormanshylyǵyndaǵy órtten zardap shegip jatqan ǵımarattarda adam turmaıtynyn habarlady.

Buǵan deıin jergilikti turǵyndar túsirgen beınejazbalardan Jasybaı ormanshylyǵyndaǵy ǵımarattardyń órtenip jatqanyn kórýge bolatynyn jazǵanbyz. 

Bul nysandardyń kimge tıesili ekenin anyqtap kórdik. Aýdan ákimdiginiń habarlaýynsha, janyp jatqan qos ǵımaratta adam turmaıdy.

- Beınejazbada janyp jatqany túsirilgen ǵımarattar buryn qoldanysta bolǵan eski úıler, qazir adam turmaıdy. Jasybaı demalys aımaǵyna kireberiste ornalasqan. Úıler jeke adamǵa tıesili, biraq ıesi belgisiz. Qos ǵımarat ta bir aýmaqta ornalasqany sebepti, ekeýiniń de ıesi bireý bolýy múmkin dep oılaımyz, - dep málimdedi Baıanaýyl aýdany ákimdiginen.

Eske sala keteıik, Baıanaýylda ulttyq parkke qarasty jerler órtenip jatyr. 

Tótenshe jaǵdaılar mınıstrligi Baıanaýyldaǵy eldi mekenderge qaýip joq ekenin málimdedi. 

Órtenip jatqan Baıanaýyl ulttyq parkine jyl saıyn 120 myńnan astam týrıst keledi.