Baıanaýylda órt shalǵan jerlerdiń aýmaǵy 10 myń gektarǵa jetken
PAVLODAR. KAZINFORM — Búgin saǵat 14.30-da Pavlodar oblysy, Baıanaýyl aýdany aýmaǵynda jalpy aýdany 10 myń gektar bolatyn dala órti oqshaýlanǵan. Tilsiz jaýdyń betin qaıtarýǵa 236 adam, 42 tehnıka, 2 áýe kemesi, 3 ushqyshsyz ushý apparaty jumyldyrylǵan.
Bul týraly QR Tótenshe jaǵdaılar mınıstrliginiń baspasóz qyzmetinen habarlady.
- Órtti sóndirýge Pavlodar oblysy, Astana qalasy tótenshe jaǵdaı departamentteriniń, sondaı-aq Abaı oblysynan jáne QR TJM 68303 áskerı bóliminiń qutqarýshy toptary, orman sharýashylyǵy qyzmetteri jáne jergilikti atqarýshy organdardan erikti órt sóndirý quralymdary qatysty. Oqshaýlaýǵa 236 adam, 42 tehnıka, 2 áýe kemesi, 3 ushqyshsyz ushý apparaty jumyldyryldy. Barlyǵy 64 tonna sý tógildi. Sý Shalqarkól kólinen jáne Jeltaý kentindegi uńǵymadan alyndy. Qazirgi ýaqytta jergilikti órt oshaqtaryn joıý jumystary júrgizilip jatyr,-dep málimdedi mınıstrlikten.
Búgin tańerteń Pavlodar oblysynyń ákimi Asaıyn Baıhanov Baıanaýyldaǵy órttiń joly bógelip, barlyǵy 6 myń gektar dala órti oqshaýlandy dep habar bergen.
Al QR Tótenshe jaǵdaılar mınıstrliginiń usynǵan málimeti óńir basshysy usynǵan tsıfrlardan 4 myń gektarǵa kóp. Soǵan qaraǵanda Baıanaýylda búgin tańerteńneń beri dala órtiniń aýmaǵy ulǵaıa túskeni baıqalady. Mamandar órttiń qashan tolyq joıylatynyn aıta almaı otyr.
Eske sala keteıik, 6 qazan kúni Baıanaýylda jer órtenip, bir aýyldyń turǵyndary qaýipsiz aýmaqqa kóshirildi.
Órt shalǵan jerge jaqyn ornalasqan Jumat Shanın aýylyna qaýip tónip turǵan joq.
Tikushaqtar Pavlodar men Qaraǵandy shekarasyndaǵy órt oshaqtaryna 22 tonna sý tókti.
