Baıanaýylda muz ústinde syrǵanaǵan aqqýlar men jelmen jarysqan kıikter beınejazbaǵa túsip qaldy
PAVLODAR. KAZINFORM – Sırek kezdesetin aqbókender men aqqýlardyń jazǵyturym jappaı kelip jatýy ulttyq park aýmaǵynyń jan-janýarlar úshin qolaıly orta ekeniniń belgisi deıdi mamandar.
Jelide Baıanaýyl ulttyq parkiniń aýmaǵynda túsirilgen erekshe beınejazba tarap jatyr. Onda muz ústinde syrǵanaı basyp bara jatqan qos aqqý men jazyq dalada emin-erkin jaıylyp júrgen kıikter beınelengen. Bul rolıkti jergilikti bloger, tabıǵat janashyry Esen Júsipbaev túsirgen.
– Osyndaı jerdiń bar ekenine senesiń be?
Kólde – aqqý,
Dalada – aqbóken.
Qazaqtyń keń dalasy, - dep jazdy Instagram-daǵy paraqshasynda avtor.
Mamandardyń aıtýynsha, mundaı tabıǵı kóshi-qon – ekojúıeniń saýlyǵynyń mańyzdy kórsetkishi ári sırek túrdi qorǵaýǵa baǵyttalǵan keshendi is-sharalardyń nátıjesi.
Ulttyq park aýmaǵynda sý aıdyndary men shalǵyndy jerler mol. Aqbókender munda jazǵyturym top-tobymen jınalyp, tóldeıdi. Jaz-kúz aılarynda Baıanaýyl men Maı aýdandarynda 30 myńǵa deıin aqbóken josyp júredi. Jalpy Pavlodar oblysynyń aýmaǵynda kıikter joǵaryda atalǵan aýmaqtardan bólek, Aqsý men Ekibastuz aýyldyq aımaqtarynda da kezdesedi.
Buǵan deıin Pavlodar óńirine aqqýlar ushyp kele bastaǵanyn jazǵanbyz.
